സയ്യിദ് ത്വാഹിറുല്‍ അഹ്ദല്‍: ആര്‍ദ്രതയുടെ തീര്‍ത്ഥം
ആത്മീയതയും വിദ്യാഭ്യാസ പ്രവര്‍ത്തനവും ആതുര സേവനവും ജീവിത വ്രതമാക്കിയ സയ്യിദ് ത്വാഹിറുല്‍ അഹ്ദല്‍ തങ്ങള്‍ വേര്‍പിരിഞ്ഞ് ഒരു വ്യാഴവട്ടക്കാലം പിന്നിടുന്നു. ഒരു പണ്ഡിതനും ആത്മീയ നായകനുമുണ്ടാവേണ്ട സവിശേഷണങ്ങളെല്ലാം സമ്മേളിച്ച വ്യക്തിത്വമായിരുന്നു അദ്ദേഹം. നന്മയുടെയും നേരിന്റയും നാമ്പുകള്‍ നട്ടുപിടിപ്പിക്കാന്‍ എത്രയേറെ കഷ്ടനഷ്ങ്ങള്‍ സഹിക്കാന്നും എത്രദൂരം സഞ്ചരിക്കാനും തയ്യാറായിരുന്നു ആ കര്‍മ്മയോഗി.
കാരിരുമ്പിനെ വെല്ലുന്ന ആത്മീയ കരുത്തും നിഷ്‌കളങ്കതയും തഖ്‌വയിലധിഷ്ടിതമായ ജീവിതവും ലക്ഷ്യം വെക്കുന്നതെല്ലാം നിഷ്പ്രയാസം നേടിയെടുക്കാനും അതിജീവിക്കാനും സാധിച്ചു. പാവങ്ങളുടെ തോഴനായി, അശണരുടെ അഭയമായി, ആലംബഹീനരുടെ ആശ്വാസമായി, അനാഥരുടെ കൈത്താങ്ങായി, രോഗികളുടെ ശാന്തി ദൂതനായി, നിര്‍ധനരുടെയും നിസ്സഹായരുടെയും ആശ്രയവുമായി മാറി ത്വാഹിര്‍ തങ്ങള്‍. ത്വാഹിര്‍ എന്ന പേരിനെ അന്വര്‍ത്ഥമാക്കും വിധം വിശുദ്ധവും വെണ്മ നിറഞ്ഞതുമായിരുന്നു അവിടുത്തെ ജീവിതം. നീണ്ട കാലത്തെ ജീവിതമൊന്നും പറയാനില്ലെങ്കിലും ജീവിച്ച കാലം മത-സമൂഹിക-സാംസ്‌കാരിക-വിദ്യാഭ്യാസ രംഗത്തെ പ്രശോഭിതമായി അടയാളപ്പെടുത്തി. സമൂഹത്തിന് മാര്‍ഗ്ഗ ദര്‍ശനത്തിന്റെയും മാതൃകാജീവിതത്തിന്റെയും അനേകമനേകം സന്ദേശങ്ങള്‍ കൈമാറി.
ജാതി-മത-വര്‍ഗ്ഗ-വര്‍ണ്ണ-വൈജാത്യമില്ലാതെ സര്‍വ്വരുടെയും ആദരവും അംഗീകാരവും നേടിയെടുക്കാനായത് തന്റെ കറ കളഞ്ഞ വ്യക്തിത്വവും മാതൃകാപരമായ ജീവിതവും കൊണ്ട് മാത്രമാണ്. വിജ്ഞാനത്തോടും അധ്യാപനത്തോടുമുണ്ടായ ആത്മാര്‍ത്ഥതയും നിസ്വാര്‍ത്ഥമായ താല്‍പര്യവും പാണ്ഡിത്യത്തിന്റെ ഉത്തുംഗ ഗിരിമയാക്കി. ഒരുവിദ്യാര്‍ത്ഥിയെപ്പോലെ ജിജ്ഞാസയോടെ, അനുസരണയോടെ ആരെയും പഴിക്കാത്ത ജീവിതം. സൗമ്യവും ലാളിത്യവും എളിമയും കൈമുതലാക്കി നിറ പുഞ്ചിരിയോടെ മാറ്റങ്ങളുടെ ഇതിഹാസങ്ങള്‍ സൃഷ്ടിച്ചു. മുഹിമ്മാത്തിന്റെ പിറവിയും പുരോഗതിയുടെ പാതയിലുള്ള ജൈത്രയാത്രയും ഇതിലൊന്നാണ്. ആദര്‍ശരംഗത്ത് അണു അളവ് വിട്ടുവീഴ്ചയോ അനുനയമോ ഇല്ല. മതാശയങ്ങളെ മാറ്റി മറിക്കുന്നതും തീവ്രവാദത്തിന്റെയും വര്‍ഗ്ഗീയതയുടെയും വിഷം കലര്‍ത്തുന്നതിനോടും സന്ധിയില്ലാ സമരം ചെയ്തു. ജീവകാരുണ്യ പ്രവര്‍ത്തനങ്ങളിലും സാന്ത്വനസേവനരംഗത്തും തങ്ങള്‍ നിറഞ്ഞു നിന്നു. പശിയടക്കാന്‍ വകയില്ലാത്തവര്‍ക്ക്, വീടില്ലാത്തവര്‍ക്ക്, മരുന്നില്ലാത്തവര്‍ക്ക്, വിദ്യാഭ്യാസം മുടങ്ങിയവര്‍ക്ക്, ജീവിതം വഴിമുട്ടിയവര്‍ക്ക് ഒരു കൈത്താങ്ങായി. പ്രവാചക സ്‌നേഹത്തില്‍ ചാലിച്ചെടുത്ത അവാച്യവും അവര്‍ണ്ണനീയവുമായ ജീവിതം അവിടുത്തെ നടപ്പിലും ചിന്തകളിലും തെളിഞ്ഞു നിന്നു. പ്രവാചകാനുരാഗത്തില്‍ സന്തോഷിക്കുകയും വേദനിക്കുകയും ചെയ്തിരുന്ന മനസ്സും സയ്യിദ് ത്വാഹിര്‍ തങ്ങള്‍ക്കുണ്ടായിരുന്നു.




അബൂബക്കര്‍ സഅദി നെക്രാജെ
writter



Other Articles