ചെറിയ പെരുന്നാള്‍ ലോക സമൂഹത്തിന്റെ ആഘോഷം
ഈദുല്‍ ഫിത്തര്‍ അഥവാ ചെറിയ പെരുന്നാള്‍ ഉയര്‍ത്തിക്കാട്ടുന്ന മാനവികതയുടെ സന്ദേശം നാള്‍ക്കുനാള്‍ ഓര്‍മ്മപ്പെടുത്തിക്കൊണ്ടിരിക്കുന്നത് ഇത് മുസ്‌ലിങ്ങളുടെ മാത്രമല്ല, മറിച്ച് ലോക സമൂഹത്തിന്റെ ഒന്നാകെയുള്ള ആഘോഷമെന്നതാണ്.
ഒരു മാസത്തെ ചിട്ടയായ റമദാന്‍ വ്രതത്തിന് ശേഷം വിശുദ്ധമായ മനസ്സോടെ ചെറിയ പെരുന്നാള്‍ ആഘോഷിക്കുന്നവരില്‍ മുസ്‌ലിങ്ങള്‍ മാത്രമല്ല ഉള്ളത്. റമദാന്‍ വ്രതം നല്‍കുന്ന സഹനത്തിന്റെയും ത്യാഗത്തിന്റെയും ജീവിത രീതികള്‍ മനസ്സിനും ശരീരത്തിനും ഒരു പോലെ ആരോഗ്യപ്രദമാണെന്ന തിരിച്ചറിവില്‍ ഇതര മതവിഭാഗങ്ങളില്‍പ്പെട്ടവര്‍ പോലും ഈ വ്രതത്തില്‍ പങ്കാളികളാകുന്ന കാഴ്ചയാണ് ലോകത്തിന്റെ എല്ലാ ഭാഗങ്ങളിലും കാണുന്നത്. ഒരിക്കല്‍ ഈ വ്രതമെടുത്താല്‍ എല്ലാ വര്‍ഷത്തെയും ഒരു മാസക്കാലം ശാരീരികേഛകളെ അതിജീവിച്ചും അന്ന പാനീയങ്ങള്‍ ഉപേക്ഷിച്ചും നോമ്പെടുക്കുന്ന ശീലം ഉപേക്ഷിക്കാന്‍ ഇതര വിഭാഗത്തില്‍പ്പെട്ടവരായാല്‍ പോലും സാധിക്കുകയില്ലെന്നതാണ് വാസ്തവം. കാരണം അതിന്റെ ഗുണഫലങ്ങള്‍ അത്രയ്ക്കും അനുഭവഭേദ്യമാകുന്നവര്‍ക്ക് റമദാന്‍ വ്രതം ജീവിതത്തിലെ ഒരു പ്രധാന ഘടകമാണെന്ന് നോമ്പെടുക്കാറുള്ള അമുസ്‌ലിംങ്ങളായ ആളുകള്‍ പോലും സാക്ഷ്യപ്പെടുത്തുന്നത് കണ്ടിട്ടുണ്ട്.
ഒരു വ്യക്തിയെ ദുഷ്ചിന്തകളില്‍ നിന്നും ദുഷ്‌കര്‍മ്മങ്ങളില്‍ നിന്നും അകറ്റി അവനില്‍ ശുദ്ധീകരണത്തിന്റെ പ്രക്രിയകള്‍ പ്രദാനം ചെയ്യുന്ന വ്രതമാസത്തിന് ശേഷമുള്ള ചെറിയ പെരുന്നാള്‍ നന്മയുടെ ആഘോഷമാണ്. സ്‌നേഹം സൗഹാര്‍ദ്ദം, കാരുണ്യം, സേവനം തുടങ്ങി അടിസ്ഥാനപരമായ മാനുഷിക ഗുണങ്ങളുടെ സംഗമം കൂടിയാണ് ചെറിയ പെരുന്നാള്‍. ഇസ്‌ലാം മത വിശ്വാസികള്‍ക്കൊപ്പം മറ്റ് മത വിഭാഗങ്ങളില്‍പ്പെട്ടവരും പെരുന്നാള്‍ ആഘോഷത്തില്‍ സൗഹാര്‍ദ്ദത്തിന്റെ കണ്ണികളായി ഒത്തു ചേരുന്നു. എല്ലാ വിഭാഗം ജനങ്ങളും ഇടകലര്‍ന്നും ഇടപഴകിയും പെരുന്നാള്‍ ആഘോഷത്തില്‍ സജീവമാകുമ്പോള്‍ അവിടെ മാനവിക ഐക്യത്തിന്റെ പങ്കാളിത്തം കൂടി ഊട്ടിയുറപ്പിക്കപ്പെടുന്നു. ജീവിതത്തില്‍ സ്വാര്‍ത്ഥത വര്‍ധിക്കുകയും സ്‌നേഹവും കാരുണ്യവും ചോര്‍ന്നു പോവുകയും ചെയ്യുന്നുവെന്ന ഘട്ടമെത്തുമ്പോള്‍ തന്നെയാണ് മനുഷ്യമനസ്സിനെ നേര്‍ദിശയിലേക്ക് തിരിച്ചുവിടുന്ന ശിക്ഷണമായി പ്രവാചക ഉദ്‌ബോധനത്തിന്റെ റമദാന്‍ ജീവിത മൂല്യങ്ങള്‍ കടന്നു വരാറുള്ളത്. ആയുഷ്‌കാലം ഈ മൂല്യങ്ങളില്‍ ചിട്ടപ്പെടുത്തിയ ജീവിതം നില നിര്‍ത്താന്‍ കഴിഞ്ഞാല്‍ ആവ്യക്തി എത്തിപ്പെടുക ഔന്നത്യമാര്‍ന്ന മാനവിക നിലവാരത്തിലായിരിക്കും. അത്തരം ജീവിതമാതൃകകളിലൂടെ മാത്രമേ ഉദാത്തമായ സമൂഹത്തെ സൃഷ്ടിക്കാന്‍ സാധിക്കുകയുള്ളൂ.
റമദാന്‍ വ്രതമാസക്കാലത്തെ ജീവ കാരുണ്യ പ്രവര്‍ത്തനങ്ങള്‍ മനുഷ്യ സമൂഹത്തിന് ആകമാനം നല്‍കുന്ന നന്മയുടെ വലിയൊരു സന്ദേശമുണ്ട്. ഉള്ളവന്‍ ഇല്ലാത്തവന് നല്‍കുക എന്നതിലപ്പുറം മഹത്തായ ജീവകാരുണ്യ പ്രവര്‍ത്തനമില്ല. ജീവിക്കാനും ജീവന്‍ നിലനിര്‍ത്താനും ഭക്ഷണവും വെള്ളവും അത്യാവശ്യമാണെന്നിരിക്കെ അതിന് നിര്‍വ്വാഹമില്ലാത്തവന്റെ അടിസ്ഥാന ആവശ്യങ്ങള്‍ നിറവേറ്റുക എന്ന പ്രപഞ്ചനീതിയാണ് റമദാന്‍ വ്രതത്തിലൂടെ പ്രായോഗികമാക്കപ്പെടുന്നത്. ഭക്ഷണത്തിനും വെള്ളത്തിനും പുറമെ വസ്ത്രവും പാര്‍പ്പിടവും എല്ലാ മനുഷ്യര്‍ക്കും ലഭ്യമാക്കുക എന്ന സമത്വ ചിന്താഗതിയെ ഉത്തേജിപ്പിക്കുന്ന കര്‍മ്മ പദ്ധതികള്‍ കൂടി ഈ മാസത്തിന്റെ ലക്ഷ്യമാര്‍ഗ്ഗങ്ങള്‍ക്ക് മാറ്റുകൂട്ടുന്നുണ്ട്.
ജാതി-മത-വര്‍ഗ്ഗ വര്‍ണ്ണവ്യത്യാസങ്ങളില്ലാതെയുള്ള ഇഫ്താര്‍ സംഗമങ്ങള്‍ മാനവികതയുടെ ചാതുര്യം വര്‍ധിപ്പിക്കുന്നു. ഈ ലോകത്തെ വൈവിധ്യമാര്‍ന്ന സംസ്‌കാരങ്ങളുടെ സ്വാധീനത്തില്‍ കഴിയുന്ന മനുഷ്യവര്‍ഗ്ഗങ്ങളെയെല്ലാം സ്‌നേഹത്തിന്റെ ഒരു കുടത്തണലില്‍ നിര്‍ത്തുന്ന പെരുന്നാളിന്റെ സൗന്ദര്യം വാക്കുകള്‍ക്കും വര്‍ണ്ണനകള്‍ക്കും അതീതമാണ്.

ടി.കെ. പ്രഭാകരന്‍





Other Articles

  മരിക്കാത്ത ഓര്‍മ്മകളില്‍ ടി.എ. ഇബ്രാഹിം സാഹിബ്

  എന്‍ഡോസള്‍ഫാന്‍ വിഷയത്തില്‍ സമഗ്ര ഗവേഷണത്തിന് എയിംസ് ഉപകരിക്കും-ഗോവിന്ദന്‍ പള്ളിക്കാപ്പില്‍

  എയിംസിന്റെ കാര്യത്തില്‍ നിഷേധാത്മക സമീപനമുണ്ടായാല്‍ ചെറുക്കണം-പി.ബി.അബ്ദുറസാഖ്

  ദിലീപ് വീണ്ടും ഷൂട്ടിങ് തിരക്കുകളിലേക്ക്...

  ഹനാന്റെ കഥ വിശ്വസിച്ചു, സിനിമയ്ക്കായി നാടകം കളിച്ചതല്ല- അരുണ്‍ ഗോപി

  ഓര്‍മ്മയില്‍ നന്മയുടെ ആ പ്രകാശ ഗോപുരങ്ങള്‍

  ജനപ്രതിനിധികള്‍ ഉണര്‍ന്നു പ്രവര്‍ത്തിച്ചാല്‍ എയിംസ് യാഥാര്‍ത്ഥ്യമാകും-ഹക്കീം കുന്നില്‍

  എയിംസ് കാസര്‍കോടിന് നഷ്ടമാകാതിരിക്കാന്‍ ആരോഗ്യമന്ത്രിയെ കാണും- അസീസ് കടപ്പുറം

  സര്‍ക്കാരില്‍ സമ്മര്‍ദ്ദം ശക്തമാക്കിയാല്‍ എയിംസ് നേടിയെടുക്കാം -അഡ്വ. കെ. ശ്രീകാന്ത്

  എയിംസ് നിര്‍ബന്ധ ബുദ്ധിയോടെ നേടിയെടുക്കണം -എം.സി.ഖമറുദ്ദീന്‍

  എയിംസ് കാസര്‍കോടിന് തന്നെ നല്‍കുന്നതിന് സര്‍ക്കാറിന് എതിര്‍പ്പില്ല-സി.എച്ച്.കുഞ്ഞമ്പു

  കണ്ണില്‍, ക്ഷമിക്കണം, റോഡില്‍ എത്രകാലം പൊടിയിടും?

  എയിംസ് എന്ന ലക്ഷ്യത്തിന് വേണ്ടി ഒറ്റക്കെട്ടായി നിന്ന് പോരാടണം-കെ. അഹമ്മദ് ഷരീഫ്

  എയിംസ് വിഷയത്തില്‍ ബഹുസ്വരം വേണ്ട; ഏകസ്വരം മതി -നാരായണന്‍ പേരിയ

  ഈ തലമുറയുടെയും വരും തലമുറയുടെയും സുരക്ഷക്ക് എയിംസ് കൂടിയേ തീരൂ-ഡോ. അംബികാസുതന്‍ മാങ്ങാട്