പുണ്യവും സംതൃപ്തിയും മാത്രമല്ല, ആരോഗ്യ സംരക്ഷണം കൂടിയാണ് വ്രതാനുഷ്ഠാനം
വ്രതാനുഷ്ഠാനം ഒരു ആരാധന എന്ന നിലയില്‍ വിശ്വാസിക്ക് നല്‍കുന്ന ആത്മ സംതൃപ്തിക്കും പുണ്യത്തിനും പുറമെ എണ്ണിയാലൊടുങ്ങാത്ത ഗുണങ്ങള്‍ വേറെയുമുണ്ട്. നോമ്പുകാരന് അല്ലാഹുവിന്റെ അളവറ്റ അനുഗ്രഹം ലഭിക്കുന്നു എന്നതിന് പുറമെ വ്രതാനുഷ്ഠാനം അവന്റെ ആരോഗ്യ കാര്യത്തിലും ഗുണകരമാവുന്നു. അമിതവും ക്രമം തെറ്റിയതുമായ ആഹാര രീതിയാണ് മനുഷ്യനെ പലപ്പോഴും രോഗങ്ങളിലേക്ക് നയിക്കുന്നത്. അമിതാഹാരത്തെ ഇസ്ലാം വിലക്കുന്നുണ്ട്. മൂന്നിലൊന്ന് ഭാഗം ഭക്ഷണവും മൂന്നിലൊന്ന് വെള്ളവും മൂന്നിലൊന്ന് ഒഴിഞ്ഞ വയറുമായിരിക്കണമെന്ന് പ്രവാചകനും അരുളിയിട്ടുണ്ട്. ഹൃദ്രോഹം, പ്രമേഹം, അമിത രക്തസമ്മര്‍ദ്ദം എന്നിവക്ക് മുഖ്യകാരണം അമിത വണ്ണമാണ്. ഭക്ഷണം നിയന്ത്രിക്കുന്നതിലൂടെ ഒരു പരിധി വരെ കൊഴുപ്പും മാംസവും കുറക്കാന്‍ കഴിയുന്നതോടെ ഈ രോഗങ്ങള്‍ക്ക് ശമനമുണ്ടാവുകയും ചെയ്യുന്നു.
വ്രതം മനുഷ്യരെ ആരോഗ്യപരമായും മാനസികപരമായും സംസ്‌കരിക്കുന്നു. അത് മനുഷ്യമനസ്സിലെ അസ്വസ്ഥതകള്‍ ഇല്ലാതാക്കുന്നു. വ്രതം ഹൃദ്രോഗത്തെ ഒരു അളവോളം ചെറുക്കുകയും കാന്‍സറിനെ ഒരു പരിധി വരെ തടയുകയും ചെയ്യുന്നു. വ്രതാനുഷ്ഠാനം നിരവധി രോഗങ്ങള്‍ക്കാണ് അത്ഭുതകരമാം വിധം ശമനം നല്‍കുന്നത്. ആമാശയം ശുചീകരിച്ച് രോഗപ്രതിരോധ ശേഷി വര്‍ധിപ്പിക്കുന്നുവെന്ന് ശാസ്ത്രം സമ്മതിക്കുന്നുണ്ട്. ശരീരത്തിന്റെ ഭാരം കുറക്കാനും ചര്‍മ്മത്തിന്റെ അടിയിലുള്ള കൊഴുപ്പിന്റെ അളവ് കുറക്കാനും വ്രതാനുഷ്ഠാനം നിര്‍വഹിക്കുന്ന ഒരാള്‍ക്ക് കഴിയുന്നു. രക്തത്തിലെ കാര്‍ബണ്‍ ഡൈ ഓക്‌സൈഡിന്റെയും സോഡിയം മഗ്‌നിഷ്യത്തിന്റെയും അളവ് കുറക്കാനും പൊട്ടാസ്യത്തിന്റെയും കാത്സ്യത്തിന്റെയും ലവണങ്ങള്‍ വര്‍ധിപ്പിക്കാനും വ്രതാനുഷ്ഠാനം ഗുണം ചെയ്യുന്നു.





Other Articles