updated on:2018-11-27 06:45 PM
പി.ബി. അബ്ദുല്‍ റസാഖിന് അന്തിമോപചാരമര്‍പ്പിച്ച് നിയമസഭ ഇന്നത്തേക്ക് പിരിഞ്ഞു

www.utharadesam.com 2018-11-27 06:45 PM,
തിരുവനന്തപുരം: ഇന്ന് ആരംഭിച്ച നിയമസഭാ സമ്മേളനം മഞ്ചേശ്വരം എം.എല്‍.എ. പി.ബി. അബ്ദുല്‍ റസാഖിന് അന്തിമോപചാരമര്‍പ്പിച്ച് ഇന്നത്തേക്ക് പിരിഞ്ഞു. മുസ്‌ലിം ലീഗിന്റെ എം.എല്‍.എ. ആയിരിക്കെ തന്നെ ഒരിക്കല്‍ പരിചയപ്പെടുന്നവരെല്ലാം ഓര്‍ത്തിരിക്കുന്ന വ്യക്തിത്വമായിരുന്നു അബ്ദുല്‍ റസാഖിന്റേതെന്നും അദ്ദേഹത്തിന്റെ വിയോഗം സഭക്ക് തീരാനഷ്ടമാണെന്നും അന്തിമോപചാരമര്‍പ്പിച്ച് സ്പീക്കര്‍ പി.ശ്രീരാമകൃഷ്ണന്‍ പറഞ്ഞു.
തുടര്‍ന്ന് സംസാരിച്ച മുഖ്യമന്ത്രി പിണറായി വിജയന്‍, ജനഹൃദയങ്ങളില്‍ ഇടം പിടിച്ച നേതാവായിരുന്നു പി.ബി. അബ്ദുല്‍ റസാഖെന്ന് അനുസ്മരിച്ചു. അബ്ദുല്‍ റസാഖിന്റെ സേവനങ്ങള്‍ കേരളം എന്നും സ്മരിക്കുമെന്നും മുഖ്യമന്ത്രി പറഞ്ഞു. രാവിലെ നിയമസഭാ സമ്മേളനം ആരംഭിച്ചയുടന്‍ പ്രതിപക്ഷ നേതാവ് രമേശ് ചെന്നിത്തലയാണ് അനുശോചന പ്രമേയം അവതരിപ്പിച്ചത്. കഠിനാധ്വാനിയായ നേതാവായിരുന്നു അബ്ദുല്‍ റസാഖെന്നും ജനക്ഷേമമായിരുന്നു അദ്ദേഹത്തിന്റെ മുന്‍ഗണനയെന്നും ചെന്നിത്തല പറഞ്ഞു. പ്രസംഗമായിരുന്നില്ല ജനസേവനമായിരുന്നു റസാഖ് മഞ്ചേശ്വരം മണ്ഡലത്തില്‍ നടത്തിയത്. ഏഴ് വര്‍ഷം എം.എല്‍.എ. ആവുന്നതിന് മുമ്പ് താഴെത്തട്ടില്‍ തദ്ദേശ സ്വയംഭരണ സ്ഥാപനങ്ങളില്‍ പ്രവര്‍ത്തിച്ച കൈമുതല്‍ അബ്ദുല്‍ റസാഖിന് ഉണ്ടായിരുന്നു. ജനക്ഷേമത്തിന് വേണ്ടി മണ്ഡലത്തിലെ മുക്കിലും മൂലയിലും എത്താനും സൗഹൃദമുണ്ടാക്കാനും അദ്ദേഹത്തിന് കഴിഞ്ഞു. കാസര്‍കോട് പാക്കേജ് യാഥാര്‍ത്ഥ്യമാക്കാന്‍ അദ്ദേഹം മുന്നിലുണ്ടായിരുന്നു. കന്നട ഭാഷാ ന്യൂനപക്ഷത്തിന് വേണ്ടി നടത്തിയ പോരാട്ടങ്ങളും വിസ്മരിക്കാന്‍ ആവില്ല. കന്നടയിലാണ് അദ്ദേഹം സത്യപ്രതിജ്ഞ ചെയ്തത്-ചെന്നിത്തല പറഞ്ഞു.
നിയമസഭാ സമ്മേളനം കഴിഞ്ഞ് നാട്ടിലെത്തിയാല്‍ മുറ്റത്ത് കൂടി നില്‍ക്കുന്ന പരാതിക്കാരുടെ പ്രശ്‌നങ്ങള്‍ക്ക് പരിഹാരം കണ്ടെത്തിയതിന് ശേഷം മാത്രമേ അബ്ദുല്‍ റസാഖ് വീട്ടിനകത്ത് കയറുകയോ ഭക്ഷണം കഴിക്കുകയോ ചെയ്തിരുന്നുള്ളുവെന്ന് പ്രതിപക്ഷ ഉപനേതാവ് ഡോ. എം.കെ. മുനീര്‍ പറഞ്ഞു.
പൈവളികെയില്‍ 80 സെന്റ് സ്ഥലവും ചെങ്കളയില്‍ ഒരേക്കര്‍ സ്ഥലവും പാവപ്പെട്ടവര്‍ക്ക് വീട് വെക്കാന്‍ നല്‍കുകയും എം.എല്‍.എ. എന്ന നിലയില്‍ കിട്ടുന്ന ശമ്പളം പാവപ്പെട്ടവരുടെ ആവശ്യങ്ങള്‍ക്കായി അദ്ദേഹം മാറ്റിവെക്കുകയും ചെയ്തുവെന്ന് മുനീര്‍ പറഞ്ഞു.
മന്ത്രി വി.എസ്. സുനില്‍കുമാര്‍, നിയമസഭയിലെ വിവിധ കക്ഷി നേതാക്കള്‍ തുടങ്ങിയവരും അബ്ദുല്‍ റസാഖിനെ അനുസ്മരിച്ച് സംസാരിച്ചു.
ഓര്‍ഡിനന്‍സുകള്‍ക്ക് പകരം ബില്ലുകള്‍ പാസാക്കാനാണ് നിയമസഭാ സമ്മേളനം തുടങ്ങിയത്. മന്ത്രി കൃഷ്ണന്‍ കുട്ടിയുടെ സത്യപ്രതിജ്ഞ ഇന്ന് വൈകിട്ട് നടക്കും.



Recent News
  മോദിക്ക് ആശ്വാസം; റഫാല്‍ ഇടപാടില്‍ അന്വേഷണമില്ല

  പ്രതിപക്ഷ ഐക്യത്തിന് ശക്തി പകര്‍ന്ന് കേന്ദ്രമന്ത്രി രാജിവെക്കുന്നു

  ചിറക് വിരിച്ച് കണ്ണൂര്‍; ആദ്യ വിമാനം പറന്നു

  കണ്ണൂരില്‍ നിന്ന് വിമാനമുയരുമ്പോള്‍ കാസര്‍കോടിനും അഭിമാനം

  സുരേന്ദ്രന് ജാമ്യം; പത്തനംതിട്ട ജില്ലയില്‍ പ്രവേശിക്കരുത്

  കണ്ണൂര്‍ വിമാനത്താവള ഉദ്ഘാടനം യു.ഡി.എഫ്. ബഹിഷ്‌കരിക്കും

  സര്‍ക്കാറിനും കെ. സുരേന്ദ്രനും ഹൈക്കോടതിയുടെ രൂക്ഷ വിമര്‍ശനം

  അമേരിക്കന്‍ മുന്‍ പ്രസിഡണ്ട് ജോര്‍ജ് ബുഷ് സീനിയര്‍ അന്തരിച്ചു

  സഭ ഇന്നും കലുഷിതം; വാക്‌പോര്

  സന്നിധാനത്ത് വല്‍സന്‍ തില്ലങ്കേരി മെഗാഫോണ്‍ ഉപയോഗിച്ചതിനെ ന്യായീകരിച്ച് മുഖ്യമന്ത്രി

  സ്പീക്കറുടെ ഡയസിലേക്ക് ഇരച്ചുകയറാന്‍ പ്രതിപക്ഷ ശ്രമം; സഭ നിര്‍ത്തിവെച്ചു

  പി.കെ ശശി ലൈംഗികാതിക്രമം കാട്ടിയിട്ടില്ലെന്ന് കമ്മീഷന്‍ റിപ്പോര്‍ട്ട്

  ശബരിമല: പ്രതിഷേധം സര്‍ക്കാറിനെതിരെയല്ല, സുപ്രീംകോടതിക്കെതിരെയെന്ന് സത്യവാങ്മൂലം

  ഇന്‍ഡോ-അറബ് കോണ്‍ഫെഡറേഷന്‍ കൗണ്‍സില്‍: ഹസൈനാര്‍ ഹാജി തളങ്കര പ്രസിഡണ്ട്

  ശബരിമലയിലെ നിരോധനാജ്ഞ; ഹൈക്കോടതി വിശദീകരണം തേടി