updated on:2019-02-18 07:06 PM
ഇരട്ടക്കൊലയില്‍ ഞെട്ടിത്തരിച്ച് ജില്ല; അന്വേഷണത്തിന് പ്രത്യേക സംഘം

www.utharadesam.com 2019-02-18 07:06 PM,
കാസര്‍കോട്: പെരിയ കല്ല്യോട്ട് രണ്ട് യൂത്ത് കോണ്‍ഗ്രസ് പ്രവര്‍ത്തകരെ മൃഗീയമായി കൊലപ്പെടുത്തിയതില്‍ ഞെട്ടിത്തെരിച്ച് ജില്ല. സംസ്ഥാന വ്യാപകമായി പ്രതിഷേധം അലയടിക്കുന്നു. കൊലപാതകത്തില്‍ പ്രതിഷേധിച്ച് യൂത്ത് കോണ്‍ഗ്രസ് ആഹ്വാനം ചെയ്ത ഹര്‍ത്താലിനെ തുടര്‍ന്ന് വിവിധ ജില്ലകളില്‍ പ്രവര്‍ത്തകര്‍ തെരുവിലിറങ്ങി. പലയിടത്തും വാഹനങ്ങള്‍ തകര്‍ത്തു. കടകള്‍ അടപ്പിച്ചു.
ഇരട്ടക്കൊലപാതകത്തില്‍ സി.പി.എമ്മിന് പങ്കില്ലെന്നാണ് പാര്‍ട്ടി ജില്ലാ നേതൃത്വം പറയുന്നതെങ്കിലും കൊലപാതകത്തില്‍ സി.പി.എം പ്രദേശിക നേതൃത്വത്തിന് പങ്കുണ്ടെന്ന് എഫ്.ഐ.ആറില്‍ പറയുന്നു. കൊല്ലപ്പെട്ടവരോട് പ്രദേശത്തെ സി.പി.എം പ്രവര്‍ത്തകര്‍ക്കുള്ള മുന്‍വൈരാഗ്യം കൊലപാതകത്തിലേക്ക് നയിച്ചുവെന്നാണ് എഫ്.ഐ.ആറിലെ സൂചന. കൊലപാതകം നടന്ന സ്ഥലത്ത് പൊലീസ് നടത്തിയ പരിശോധനയില്‍ വടിവാളിന്റെ പിടി കണ്ടെടുത്തിട്ടുണ്ട്. ഗൂഢാലോചന അടക്കമുള്ളവ അന്വേഷിക്കുന്നുണ്ടെന്ന് ജില്ലാ പൊലീസ് മേധാവി ഡോ. എ. ശ്രീനിവാസ പറഞ്ഞു.
അതേസമയം മുന്‍കൂര്‍ അനുമതി വാങ്ങാതെ ഹര്‍ത്താല്‍ പ്രഖ്യാപിച്ചതിന് ഹൈക്കോടതി സ്വമേധയാ കേസെടുത്തു.
യൂത്ത് കോണ്‍ഗ്രസ് പ്രവര്‍ത്തകരായ കാസര്‍കോട് പെരിയ കല്ല്യോട്ട് കുരാങ്കര സ്വദേശി ജോഷി എന്ന ശരത് (27), കല്ല്യോട്ട് ക്ഷേത്രത്തിന് സമീപത്തെ കിച്ചു എന്ന കൃപേഷ് (21) എന്നിവരാണ് ഇന്നലെ രാത്രി ഏഴരമണിയോടെ കൊല്ലപ്പെട്ടത്. കൊലയാളികളെ പിടികൂടാന്‍ പൊലീസ് പ്രത്യേക അന്വേഷണ സംഘത്തെ നിയമിച്ചു. ജില്ലാ ക്രൈംബ്രാഞ്ച് ഡി.വൈ.എസ്.പി പ്രദീപിനാണ് അന്വേഷണ ചുമതല. കണ്ണൂര്‍ ഐ.ജി ബല്‍റാം കുമാര്‍ അടക്കമുള്ള ഉന്നത പൊലീസ് ഉദ്യോഗസ്ഥര്‍ സ്ഥലത്ത് ക്യാമ്പ് ചെയ്യുന്നുണ്ട്. കല്ല്യോട്ടിനടുത്ത് തന്നിത്തോട്-കൂരാങ്കര റോഡില്‍ വെച്ചാണ്, ബൈക്കില്‍ സഞ്ചരിക്കുകയായിരുന്ന കൃപേഷും ശരത്തും വെട്ടേറ്റ് മരിച്ചത്. കല്ല്യോട്ട് ക്ഷേത്രത്തില്‍ ഉത്സവത്തിന് പോയി മടങ്ങുമ്പോഴായിരുന്നു ആക്രമണം.
വീടിന് തൊട്ടടുത്തെത്താറായപ്പോള്‍ ജീപ്പിലെത്തിയ സംഘം ബൈക്ക് തടഞ്ഞുനിര്‍ത്തി ഇരുവരേയും അടിച്ചുവീഴ്ത്തി വെട്ടുകയായിരുന്നു. അല്‍പനേരം കഴിഞ്ഞ് ഇതുവഴി വരികയായിരുന്നവരാണ് ബൈക്ക് മറിഞ്ഞുകിടക്കുന്നതും റോഡരികില്‍ ശരത് അബോധാവസ്ഥയില്‍ കിടക്കുന്നതും കണ്ടത്. ശരത്തിനെ ഉടന്‍ ആസ്പത്രിയിലേക്ക് കൊണ്ടുപോയി. വിവരമറിഞ്ഞ് ബേക്കല്‍ പൊലീസ് സ്ഥലത്തെത്തി. അപ്പോഴാണ് ശരത്തിനൊപ്പം ബൈക്കില്‍ കൃപേഷും ഉണ്ടായിരുന്നുവെന്ന് സുഹൃത്തുക്കള്‍ പറഞ്ഞത്. കൃപേഷിനെ 150 മീറ്റര്‍ അകലെ രക്തംവാര്‍ന്ന് കിടക്കുന്നതായി കണ്ടെത്തി. ആസ്പത്രിയിലേക്ക് കൊണ്ടുപോകുംവഴി കൃപേഷാണ് ആദ്യം മരിച്ചത്. മംഗലാപുരം ആസ്പത്രിയിലേക്ക് കൊണ്ടുപോവുകയായിരുന്ന ശരത് മരിച്ചതായുള്ള വിവരവും തൊട്ടുപിന്നാലെയെത്തി.
കൂരാങ്കരയിലെ സത്യനാരായണന്റെയും ലതയുടേയും മകനാണ് സജീവ യൂത്ത് കോണ്‍ഗ്രസ് പ്രവര്‍ത്തകനും ജവഹര്‍ ബാലജനവേദി പുല്ലൂര്‍പെരിയ മണ്ഡലം പ്രസിഡണ്ടും കൂടിയായ ശരത്. സഹോദരി: അമൃത.
പെയിന്റിങ് തൊഴിലാളിയായ കൃഷ്ണന്റെയും ബാലാമണിയുടേയും മകനാണ് കൃപേഷ്. രണ്ട് സഹോദരിമാരുണ്ട്.



Recent News
  പെരിയ ഇരട്ടക്കൊല: കുറ്റപത്രം നാളെ സമര്‍പ്പിച്ചേക്കും

  സാബിത്ത് വധക്കേസ് വിധി; ഹൈക്കോടതിയില്‍ അപ്പീല്‍ ഒരാഴ്ച്ചക്കകം

  കാറും ടാങ്കറും കൂട്ടിയിടിച്ച് 2 പേര്‍ക്ക് പരിക്ക്

  വീടിന്റെ മുകളില്‍ നിന്ന് വീണ് പരിക്കേറ്റ പെയിന്റിംഗ് തൊഴിലാളി മരിച്ചു

  പെരിയ ഇരട്ടക്കൊലക്കേസ്; പൊലീസ് സ്റ്റേഷന്‍ മാര്‍ച്ച് നടത്തിയ ഡി.സി.സി പ്രസിഡണ്ട് അടക്കമുള്ളവര്‍ക്കെതിരെ കുറ്റപത്രം

  വനമേഖലയില്‍ നിന്ന് ചന്ദന മരം മുറിച്ചു കടത്താന്‍ ശ്രമം; 16 കാരനടക്കം 3 പേര്‍ പിടിയില്‍

  അഡൂര്‍ വനമേഖലയില്‍ കണ്ടെത്തിയ തുടയെല്ല് വിദഗ്ധ പരിശോധനക്കയച്ചു

  കാഞ്ഞങ്ങാട്ട് പിടിയിലായ തമിഴ്‌നാട് സ്വദേശിനികള്‍ നിരവധി മോഷണക്കേസുകളില്‍ പ്രതികള്‍; വിദ്യാനഗറിലും അമ്പലത്തറയിലും കേസ്

  ഡോ. കെ. അഹമ്മദ് ബഷീര്‍ അന്തരിച്ചു

  സാബിത്ത് വധക്കേസിലെ പ്രതികളെ വിട്ടയച്ചതിനെതിരെ നിയമയുദ്ധം ശക്തമാക്കണം -പി. ജയരാജന്‍

  വാഹനാപകടത്തില്‍ മരിച്ച അമ്മക്കും മകനും കണ്ണീരില്‍ കുതിര്‍ന്ന യാത്രാമൊഴി

  സാബിത്ത് വധക്കേസ് വിധി: പൊലീസ് അന്വേഷണത്തിലെ ഗുരുതര വീഴ്ച വ്യക്തം

  കോഴിക്കോട്ട് വാഹനാപകടത്തില്‍ പരിക്കേറ്റ കൈന്താറിലെ യുവാവ് മരിച്ചു

  പാണത്തൂര്‍ ഇബ്രാഹിം മൗലവി അന്തരിച്ചു

  നുള്ളിപ്പാടിയിലെ അപകടം; പിഗ്മി ഏജന്റ് മരിച്ചു