updated on:2017-11-26 03:11 PM
ധോണിയെക്കുറിച്ച് വെളിപ്പെടുത്തലുമായി സുരേഷ് റെയ്‌ന

www.utharadesam.com 2017-11-26 03:11 PM,
മുംബൈ: ഇന്ത്യയുടെ എക്കാലത്തേയും മികച്ച നായകരുടെ നിരയില്‍ മുന്‍പന്തിയിലാണ് മഹേന്ദ്ര സിംഗ് ധോണി. പല നിര്‍ണായകഘട്ടങ്ങളിലും ടീമിന് പ്രചോദനം നല്‍കുകയും പ്രതിസന്ധിഘട്ടങ്ങളില്‍ ധൈര്യപൂര്‍വ്വം തീരുമാനങ്ങളെടുക്കുകയും ചെയ്യുന്ന ധോണിയുടെ നേതൃപാടവത്തിന്റെ ആദ്യ ഉദാഹരണമായിരുന്നു പ്രഥമ ടി-20 ലോകകപ്പിലെ പാകിസ്ഥാനെതിരായ ഫൈനല്‍.
അവസാന ഓവറില്‍ മിസ്ബാ ഉള്‍ ഹഖ് ക്രീസില്‍ നില്‍ക്കെ ജോഗീന്ദര്‍ ശര്‍മ്മയെ പന്തേല്‍പ്പിക്കാനുള്ള തീരുമാനം എല്ലാവരെയും ഞെട്ടിച്ചിരുന്നു. എന്നാല്‍ തന്റെ തീരുമാനത്തിന്റെ അവസാനം ടീമിന് കപ്പ് നേടിക്കൊടുക്കുകയായിരുന്നു ആരാധകരുടെ മഹി. പിന്നീട് നിരവധി തവണ ധോണി തന്റെ നേതൃപാടവത്തില്‍ ടീമിന് മികച്ച വിജയങ്ങളും കിരീടങ്ങളും നേടിക്കൊടുത്തു. 2011 ഏകദിന ലോകകപ്പില്‍ പൊതുവെ ആറാമതായും ഏഴാമതായും ബാറ്റിംഗിനിറങ്ങുന്ന ധോണി ടോപ് ഓര്‍ഡറിലേക്ക് സ്വയം കയറി കളിച്ചതും അപ്രതീക്ഷിത തീരുമാനമായിരുന്നു. ലോകകപ്പ് പോലെ പ്രധാന ടൂര്‍ണ്ണമെന്റ് കളിക്കുമ്പോള്‍ പൊതുവെ നായകന്‍മാര്‍ക്ക് സമ്മര്‍ദ്ദം കൂടുതലായിരിക്കും. മൈതാനത്ത് വലിഞ്ഞ് മുറുകിയ മുഖമായി നില്‍ക്കുന്ന പോണ്ടിംഗും നഖം കടിച്ച് നില്‍ക്കാറുള്ള ഗാംഗുലിയുമെല്ലാം അത്തരം നായകര്‍ക്ക് ഉദാഹരണമാണ്.
എന്നാല്‍ ധോണിയെ വിരളമായി മാത്രമെ അത്തരത്തില്‍ ഗ്രൗണ്ടില്‍ കാണാറൊള്ളു. അതുകൊണ്ടു തന്നെയാണ് താരത്തിന് ക്യാപ്റ്റന്‍ കൂള്‍ എന്ന വിശേഷണവും കിട്ടിയത്. ധോണിയുടെ ക്യാപ്റ്റന്‍ കൂള്‍ സ്വഭാവത്തെക്കുറിച്ച് പറയുകയാണ് താരത്തിന്റെ കീഴില്‍ വളര്‍ന്നു വന്ന ഇന്ത്യന്‍ താരം സുരേഷ് റെയ്‌ന. ധോണി അത്ര കൂളൊന്നുമല്ലെന്ന് പറയുകയാണ് താരം. ടി.വി സ്‌ക്രീനില്‍ നിന്നും ചാനല്‍ ക്യാമറകളില്‍ നിന്നുമെല്ലാം തന്റെ വികാരത്തെ സമര്‍ത്ഥമായി ഒളിപ്പിക്കാന്‍ ധോണിക്കറിയാമെന്ന് റെയ്‌ന പറയുന്നു.
‘ അദ്ദേഹത്തിന്റെ കണ്ണുകളില്‍ നിങ്ങള്‍ക്ക് ഒരു വികാരവും കാണാന്‍ കഴിയില്ല. നിങ്ങള്‍ എന്തെങ്കിലുമൊന്ന് പ്രതികരിക്കൂ എന്നായിരിക്കും അത് കാണുമ്പോള്‍ നമ്മുടെ മനസില്‍.’
ധോണിയ്ക്ക് ദേഷ്യം വരാറുണ്ടെന്നും എന്നാല്‍ അത് ക്യാമറക്കണ്ണുകള്‍ക്ക് പകര്‍ത്താന്‍ കഴിയില്ലെന്നും റെയ്‌ന പറയുന്നു. ധോണിയുടെ നേതൃപാടവത്തെക്കുറിച്ചും റെയ്‌നയ്ക്ക് വ്യക്തമായ നിരീക്ഷണമുണ്ട്. സാഹചര്യത്തിനനുസരിച്ച് ഗെയിം പ്ലാന്‍ മാറ്റാന്‍ ധോണിയ്ക്ക് പ്രത്യേക കഴിവുണ്ടെന്ന് റെയ്‌ന പറഞ്ഞു. ‘ അദ്ദേഹം മികച്ച ഒരു നായകനാണ്. അടുത്തത് എന്താണ് സംഭവിക്കാന്‍ പോകുന്നതെന്നതിനെക്കുറിച്ച് അദ്ദേഹത്തിന് വ്യക്തമായ ധാരണയുണ്ട്. അദ്ദേഹം പ്ലാന്‍ എ, ബി, സി എന്നിങ്ങനെ മനസില്‍ തയ്യാറാക്കി വച്ചിട്ടുണ്ടായിരിക്കും.’
ധോണിയുടെ നായകത്വത്തിന് കീഴില്‍ നിരന്തരം അവസരം ലഭിച്ചിട്ടുള്ള താരമാണ് മികച്ച ഫീല്‍ഡര്‍ കൂടിയായ റെയ്‌ന. ഐ.പി.എല്ലില്‍ ധോണി നായകനായിരുന്ന ചെന്നൈ സൂപ്പര്‍ കിംഗ്‌സിലെ സ്ഥിരസാന്നിധ്യമായിരുന്നു റെയ്‌ന.



Recent News
  കാറഡുക്കയിലെ വീട്ടമ്മ ഏഷ്യന്‍ മാസ്റ്റേഴ്‌സ് അത്‌ലറ്റിക്ക് ചാമ്പ്യന്‍ഷിപ്പിന്

  സംസ്ഥാന പുരുഷവിഭാഗം സീനിയര്‍ കബഡി ചാമ്പ്യന്‍ഷിപ്പ് 22 മുതല്‍ കുറ്റിക്കോലില്‍

  ജില്ലാ ക്രിക്കറ്റ് അസോ. മുന്‍ പ്രസിഡണ്ടിനെ പുറത്താക്കിയ നടപടി; 21ന് കോടതി വാദം കേള്‍ക്കും

  ജില്ലാ സ്‌പോര്‍ട്‌സ് കൗണ്‍സില്‍: ഹൈക്കോടതി സ്റ്റേ തഴയപ്പെട്ടവര്‍ക്ക് ആശ്വാസമായി

  ജില്ലാ ക്രിക്കറ്റ് അസോസിയേഷന്‍: പ്രസിഡണ്ട് തിരഞ്ഞെടുപ്പിനെതിരെയുള്ള ഹര്‍ജി തള്ളി

  'ടെസ്റ്റ്: ഇന്ത്യക്ക് ചരിത്രവിജയം

  ശക്തരായ പഞ്ചാബിനെതിരെ അസ്ഹറുദ്ദീന് സെഞ്ച്വറി

  സംസ്ഥാന സീനിയര്‍ സോഫ്റ്റ്‌ബോള്‍: കോഴിക്കോട് സെമിയില്‍

  അണ്ടര്‍-14 ജില്ലാ ക്രിക്കറ്റ് ടീമിനെ തുഷാര്‍ ബി.കെ നയിക്കും

  ഏഷ്യന്‍ ബോഡി ബില്‍ഡിംഗ് ചാമ്പ്യന്‍ഷിപ്പില്‍ ഷെരീഫ് കരിപ്പൊടിക്ക് നേട്ടം

  ആറാമത് ടിഫ ട്രോഫി ഫുട്‌ബോളില്‍ ചെന്നൈ എഫ്.സി ജേതാക്കള്‍

  പ്രണയം വെളിപ്പെടുത്തി മലയാളി ക്രിക്കറ്റ് താരം സഞ്ജു സാംസണ്‍

  ഏഷ്യന്‍ ഗെയിംസ് ബാഡ്മിന്റണ്‍ പുരുഷ വിഭാഗം ; കിഡംബി ശ്രീകാന്ത് പുറത്ത്

  ലോകകപ്പ് ഫുട്‌ബോള്‍ കിരീടം: ആഹ്ലാദത്തില്‍ മുങ്ങിക്കുളിച്ച് ഫ്രാന്‍സ്

  കത്തിക്കയറാന്‍ ക്രൊയേഷ്യ, വിപ്ലവ വീര്യത്തോടെ ഫ്രഞ്ച് പട; കിരീട പോരാട്ടം ഇന്ന്