updated on:2018-10-21 06:34 PM
കൊറഗ വിഭാഗക്കാരുടെ ക്ഷേമ പ്രവര്‍ത്തനങ്ങള്‍ക്ക് കോടികള്‍ ചിലവഴിച്ചെന്ന് പറയുമ്പോഴും അവരുടെ ജീവിതം ദുരിതം തന്നെ

www.utharadesam.com 2018-10-21 06:34 PM,
ബദിയടുക്ക: പട്ടിക വര്‍ഗ്ഗ വിഭാഗത്തില്‍പ്പെട്ട കൊറഗ വിഭാഗത്തിന്റെ ക്ഷേമ പ്രവര്‍ത്തനങ്ങള്‍ക്ക് കോടികള്‍ ചിലവഴിച്ചുവെന്ന് പറയുമ്പോള്‍ കാണണം ഇവരുടെ ദുരിത ജീവിതം. ബദിയടുക്ക പഞ്ചായത്തിലെ മാടത്തടുക്ക കൊറഗ കോളനിയിലേക്ക് കടക്കുമ്പോള്‍ ഗേറ്റ് പരിസരത്ത് കാണുന്നത് കോളനിയില്‍ 45,040 രൂപ മണ്ണ് സംരക്ഷണ പദ്ധതിക്ക് ചെലവിട്ടത് വിവരിക്കുന്ന ബോര്‍ഡാണ്. 2014-15 കാലയളവിലാണ് ഇത് ചെലവഴിച്ചത്. പ്രകൃതിക്ക് തകരാറ് സംഭവിക്കുന്ന പ്രവൃത്തികള്‍ ഗോത്ര വര്‍ഗ്ഗത്തില്‍പ്പെട്ട കൊറഗ വിഭാഗക്കാര്‍ ചെയ്യാറില്ല. പ്രകൃതിയോട് ഇണങ്ങിയാണ് ഇവര്‍ ജീവിക്കുന്നത്. മണ്ണ് സംരക്ഷണം വേണം. എന്നാല്‍ ഇവര്‍ക്ക് അത്യാവശ്യമായി വേണ്ടിയിരുന്നത് വൈദ്യുതിയും ശുചിയുറിയുമാണ്. പ്രാഥമിക ആവശ്യങ്ങള്‍ നടപ്പിലാക്കാതെയാണ് മറ്റു പദ്ധതികള്‍ ഇവിടെ നടപ്പിലാക്കിയത് എന്നാണ് ആക്ഷേപമുയരുന്നത്. മുന്‍ഗണനാ ക്രമം തെറ്റി കോളനികളില്‍ നടപ്പിലാക്കുന്ന പദ്ധതികളിലൊന്നു മാത്രമാണിത്. നാലേക്കറോളമുള്ള സ്ഥലത്ത്ആറ് വീടുകളുള്ള കോളനിയില്‍ മണ്ണ് സംരക്ഷണ പ്രവൃത്തി എവിടെ നടത്തിയെന്ന് കോളനി നിവാസികള്‍ക്കറിയില്ല. കോളനിയിലെ വിജയന്റെയും രാഘവന്റെയും വീട്ടില്‍ വൈദ്യുതിയും ശുചിമുറിയുമില്ല. 15 വര്‍ഷം മുമ്പ് പണിത വീടുകളാണിത്. വെദ്യുതിക്കുള്ള വയറിങ്ങും നടത്തിയിട്ടില്ല. മണ്ണെണ്ണ വിളക്ക് അല്ലെങ്കില്‍ മെഴുകുതിരി ഉപയോഗിച്ചാണ് രാത്രികഴിയുന്നത്. ഒരു സിറ്റൗട്ടും അടുക്കളയും രണ്ട് മുറികളുമുള്ള കട്ടിലിടാനും ഉയര്‍ന്നിരിക്കാനും പറ്റാത്ത വെളിച്ചം കടക്കാത്ത ജനലുള്ള പുക പുറത്ത് പോകാത്ത ചിമ്മിണിയുള്ള വീട്ടില്‍ മണ്ണെണ്ണ വിളക്കിന്റെ പുകയും കരിയും ദേഹത്ത് വീണ് ദുരിതമനുഭവിക്കുകയാണിവര്‍. അകത്തുള്ള വസ്ത്രങ്ങളിലും ദേഹത്തും ഭക്ഷണത്തില്‍ പോലും കരിവീഴുന്നു. വീടിന് അകത്തിരിക്കുന്നതിനേക്കാള്‍ കൂടുതല്‍ പുറത്താണിവര്‍ കഴിയുന്നത്. പലവീടുകളിലും വിള്ളലും ചോര്‍ച്ചയുമുണ്ട്. മഴയത്ത് മുറിയില്‍ വെള്ളം കെട്ടി നില്‍ക്കുന്നതിനാല്‍ വെള്ളമിറങ്ങാതെ അകത്ത് കയറാന്‍ പറ്റാത്ത സ്ഥിതിയാണ്. ഇവരെ കൂടാതെ അങ്കാറ, വിജയ, ഗോപാലകൃഷ്ണ എന്നിവരുടെ വീട്ടിലും ശുചിമുറിയില്ല. വീടിന്റെ പ്ലാനില്‍ ശുചിമുറിക്കുള്ള സ്ഥലം എല്ലാ വീട്ടിലും നീക്കി വെച്ചിട്ടുണ്ട്. ഈ സ്ഥലത്ത് ശുചിമുറിക്കുള്ള മേല്‍ക്കൂരയോ, വാതിലോ, കുഴിയോ പണിതിട്ടില്ല. പലരും വെളിയിലാണ് വിസര്‍ജ്ജനം നടത്തുന്നത്. മറ്റുള്ളവരുടെ വീടിന്റെ കിടപ്പുമുറിയുടെ വലിപ്പമാണ് ഓരോ വീടുകള്‍ക്കുമുള്ളത്. മാടത്തടുക്ക, കാടമന, കാര്യാട്, പെരിയടുക്ക കോളനികളിലൊന്നും വാസയോഗ്യമായ വീടുകളില്ല. പുതിയ വീടുകള്‍ നല്‍കുന്നില്ലെന്നും അറ്റകുറ്റപണികള്‍ക്ക് സഹായം ലഭിക്കുന്നില്ലെന്നും പരാതിയുയര്‍ന്നിട്ടുണ്ട്. മാതാപിതാക്കള്‍ക്ക് വര്‍ഷങ്ങള്‍ക്കുമുമ്പ് ലഭിച്ച വീടുകളിലാണ് പലരും താമസിക്കുന്നത്. സര്‍ക്കാര്‍ സമ്പൂര്‍ണ പാര്‍പ്പിട സുരക്ഷാ പദ്ധതിയി (ലൈഫ്)ലും ഇവര്‍ക്ക് വീട് ലഭിക്കുന്നില്ല. മുമ്പ് ഇവര്‍ക്ക് മാത്രമായി പഞ്ചായത്ത് തലത്തില്‍ വീടുകള്‍ക്ക് പദ്ധതികളുണ്ടായിരുന്നത് ലൈഫ് വന്നതോടെ നഷ്ടമായതായി ഇവര്‍ ആരോപിക്കുന്നു. 2012 മുതല്‍ 14 വരെ കൊറഗര്‍ക്ക് മാത്രമായുള്ള ഭവന പദ്ധതിയിലും 2015-2016 പട്ടികവര്‍ഗക്കാര്‍ക്ക് മാത്രമായുള്ള പദ്ധതിയിലും പരിഗണിച്ചില്ല. ഊരുകൂട്ടത്തില്‍ കോളനി മൂപ്പനും പട്ടികവര്‍ഗ പ്രമോട്ടറുമൊക്കെ മുന്‍ഗണനാക്രമത്തില്‍ ഗുണഭോക്താക്കളെ കണ്ടെത്തുന്നവരുടെ പട്ടികയിലുള്ളവര്‍ക്ക് നല്‍കാതെ മറ്റുള്ളവര്‍ക്ക് നല്‍കുന്നുവെന്നും പരാതിയുയര്‍ന്നിട്ടുണ്ട്.



Recent News
  പാലത്തിന് കൈവരിയില്ല; അപകടം പതിയിരിക്കുന്നു

  ജനറല്‍ ആസ്പത്രിയില്‍ സി.പി.എം. പ്രവര്‍ത്തകര്‍ ശുചീകരണം നടത്തി

  മഴവെള്ള സംഭരണികള്‍ നോക്കുകുത്തികളാകുന്നു

  മംഗലാപുരം വിമാന ദുരന്തത്തിന് ഒമ്പതാണ്ട്; കണ്ണീരുണങ്ങാതെ നിരവധി കുടുംബങ്ങള്‍

  പൂമ്പാറ്റക്കൂട്ടം ഉണര്‍ത്തു ക്യാമ്പ് നവ്യാനുഭവമായി

  സര്‍ക്കാര്‍ ഭൂമിക്ക് കാത്തുനില്‍ക്കാതെ മുഹമ്മദലി യാത്രയായി

  കാഞ്ഞങ്ങാട് സംയുക്ത മുസ്‌ലിം ജമാഅത്തിന് എം.എ.യൂസഫലിയുടെ കാരുണ്യം

  വര്‍ഗീയ കൊലപാതക കേസുകളിലെ പ്രതികള്‍ നിയമത്തിന്റെ പഴുതില്‍ രക്ഷപ്പെടുന്നു

  മുള്ളേരിയയില്‍ ബസ് കാത്തിരിപ്പ് കേന്ദ്രമില്ല; യാത്രക്കാര്‍ ദുരിതത്തില്‍

  പൂവ് ചോദിച്ചപ്പോള്‍ പൂന്തോട്ടം ലഭിച്ചു; ആനന്ദ നിര്‍വൃതിയില്‍ ദയാബായി

  പ്ലാസ്റ്റിക് കവറുകളിലാക്കിയ മാലിന്യങ്ങള്‍ നീക്കം ചെയ്യാതെ പാതയോരങ്ങളില്‍ അതേപടി

  തീവ്ര ശുചീകരണ യത്‌നം: ചെറുവത്തൂരിലെ അഞ്ച് കുളങ്ങള്‍ക്ക് പുനര്‍ജന്മം

  കൊടുംചൂടില്‍ തെങ്ങുകളും കവുങ്ങുകളും കരിഞ്ഞുണങ്ങുന്നു

  ബി.ആര്‍.ഡി.സി പദ്ധതിപ്രകാരമുള്ള ജലവിതരണം നിര്‍ത്തി; ദുരിതത്തിലായത് ആയിരക്കണക്കിന് കുടുംബങ്ങള്‍

  പാതയോരങ്ങളില്‍ നശിക്കുന്നത് ലക്ഷങ്ങള്‍ വിലമതിക്കുന്ന മരത്തടികള്‍; അധികൃതര്‍ക്ക് മൗനം