കാസര്‍കോട്: കേരളത്തിന് നന്ദി പറഞ്ഞ് ശ്രീലങ്കന്‍ പ്രധാനമന്ത്രി റെനില്‍ വിക്രം സിംഗെ സ്വകാര്യ സന്ദര്‍ശനത്തിന് ശേഷം കാസര്‍കോട്ട് നിന്ന് മടങ്ങി. വെള്ളിയാഴ്ച ബേക്കലിലെ താജ് ഹോട്ടലില്‍ എത്തിയ അദ്ദേഹവും ഭാര്യയും ഇന്നലെ രാവിലെ ബേള കുമാരമംഗലം ശ്രീ സുബ്രഹ്മണ്യ ക്ഷേത്രം സന്ദര്‍ശിച്ചു. അവിടെ ഒരു മണിക്കൂറോളം ചിലവഴിച്ച ശേഷം റോഡ് മാര്‍ഗം വീണ്ടും ബേക്കലിലെത്തി.
രാവിലെ 11.20 ഓടെ ഹെലികോപ്ടര്‍ മാര്‍ഗം മംഗലാപുരത്തേക്ക് തിരിക്കുകയായിരുന്നു.
ബേക്കല്‍ ലളിത് റിസോര്‍ട്ട് ഹെലിപാഡില്‍ വെച്ച് ജില്ലാ കലക്ടര്‍ ഡോ. ഡി. സജിത് ബാബുവിന്റെ നേതൃത്വത്തില്‍ ഔദ്യോഗികമായി യാത്രയയപ്പ് നല്‍കി.
തനിക്ക് നല്‍കിയ സ്വീകരണത്തിനും സുരക്ഷയ്ക്കും നന്ദി പറഞ്ഞാണ് പ്രധാനമന്ത്രി റെനില്‍ വിക്രം സിംഗെ ഹെലികോപ്ടറിലേക്ക് കയറിയത്.
െൈചന്നയിലെ ശ്രീലങ്കന്‍ ഡെപ്യൂട്ടി ഹൈക്കമ്മീഷണര്‍ വിശ്വനാഥ് അപോന്‍സു, കാസര്‍കോട് ജില്ലാ പൊലീസ് മേധാവി ജെയിംസ് ജോസഫ്, സബ് കലക്ടര്‍ അരുണ്‍ കെ വിജയന്‍, എ.എസ്പി. ഡി. ശില്‍പ തുടങ്ങിയവരും ശ്രീലങ്കന്‍ പ്രധാനമന്ത്രിയെ യാത്രയാക്കുവാന്‍ എത്തിയിരുന്നു.
ശ്രീലങ്കന്‍ പ്രധാനമന്ത്രിയുടെ സന്ദര്‍ശനവുമായി ബന്ധപ്പെട്ട് മൂന്നു ദിവസമായി ജില്ലാ പൊലീസ് മേധാവിയുടെ നേതൃത്വത്തില്‍ വന്‍ സുരക്ഷയും ജില്ലയില്‍ ഒരുക്കിയിരുന്നു.
