ബദിയടുക്ക: നീര്‍ച്ചാലില്‍ അഞ്ച് കടകളില്‍ കവര്‍ച്ച നടന്നു. നീര്‍ച്ചാല്‍ മുകളിലെ ബസാറിലെ നാരായണ മണിയാണിയുടെ ഉടമസ്ഥതയിലുള്ള ഫ്രണ്ട്‌സ് ബേക്കറി, വടക്കേ മൂലയിലെ നാരായണന്റെ ഉടമസ്ഥതയിലുള്ള കെ.സി വെജിറ്റബിള്‍സ്, സമീപത്ത് ദേവപ്പ നായ്കിന്റെ ഉടമസ്ഥതയിലുള്ള ടൈലറിംഗ് ഷോപ്പ്, അതേ കെട്ടിടത്തിന് പിന്‍വശത്തുള്ള രമേശന്റെ പലചരക്ക് കട എന്നിവിടങ്ങളിലും നീര്‍ച്ചാല്‍ താഴെ ബസാറിലുള്ള കൃഷ്ണന്റെ ബി.കെ ടൈലറിംഗ് ആന്റ് ടെക്സ്റ്റല്‍സ് എന്ന കടയിലുമാണ് കവര്‍ച്ച നടന്നത്. ഇന്ന് രാവിലെ കടകള്‍ തുറക്കാനെത്തിയപ്പോഴാണ് കവര്‍ച്ച നടന്നതായി കണ്ടെത്തിയത്. കടകളുടെ ഷട്ടര്‍പൂട്ട് തകര്‍ത്താണ് മോഷണം നടത്തിയത്. എന്തൊക്കെ മോഷണം പോയെന്ന് വിശദമായ പരിശോധനയില്‍ മാത്രമേ വ്യക്തമാകുകയുള്ളൂ. പണവും സാധനങ്ങളും മോഷണം പോയതായി വ്യാപാരികള്‍ സംശയിക്കുന്നുണ്ട്.
ഇന്നലെ രാത്രിയോ ഇന്ന് പുലര്‍ച്ചയോ ആയിരിക്കാം കവര്‍ച്ച നടന്നതെന്ന് കരുതുന്നു. ഒരേ ദിവസം അഞ്ച് കടകളില്‍ കവര്‍ച്ച നടന്നത് വ്യാപാരികളെ കടുത്ത ആശങ്കയിലാഴ്ത്തിയിരിക്കുകയാണ്.
ബദിയടുക്ക പൊലീസും വിരലടയാള വിദഗ്ധരും ഡോഗ് സ്‌ക്വാഡും കവര്‍ച്ച നടന്ന കടകളിലെത്തി പരിശോധന നടത്തി.
