കാസര്‍കോട്: പഴയ ചൂരിയിലെ മദ്രാസാധ്യാപകനായിരുന്ന കുടക് സ്വദേശി മുഹമ്മദ് റിയാസ് മൗലവിയെ പള്ളിയിലെ താമസ സ്ഥലത്ത് കയറി കഴുത്തറുത്ത് കൊലപ്പെടുത്തിയ കേസില്‍ ജില്ലാ പ്രിന്‍സിപ്പല്‍ കോടതിയില്‍ അന്വേഷണ ഉദ്യോഗസ്ഥനെ വിസ്തരിക്കാന്‍ ആരംഭിച്ചു. ഇപ്പോഴത്തെ കാഞ്ഞങ്ങാട് ഡി.വൈ.എസ്.പി പി.കെ സുധാകരനെയാണ് വിസ്തരിക്കാന്‍ തുടങ്ങിയത്. റിയാസ് മൗലവി വധക്കേസ് അന്വേഷണത്തിനായി രൂപീകരിച്ച പ്രത്യേക സ്‌ക്വാഡിനെ നയിച്ചിരുന്നത് പി.കെ സുധാകരനെയായിരുന്നു. ഇന്നലെ ഉച്ചയ്ക്ക് ശേഷം മുതലാണ് സുധാകരനെ വിസ്തരിക്കാന്‍ തുടങ്ങിയത്. വിസ്താരം ഇന്നും തുടരും.
അന്വേഷണ ഉദ്യോഗസ്ഥന്റെ വിസ്താരം അവസാനിക്കുന്നതോടെ ഈ കേസിന്റെ വിചാരണ പൂര്‍ത്തിയാകും. 2017 മാര്‍ച്ച് 20ന് അര്‍ദ്ധരാത്രിയോടെയാണ് റിയാസ് മൗലവിയെ കൊലപ്പെടുത്തിയത്. സംഭവവുമായി ബന്ധപ്പെട്ട് 3 പേരാണ് അറസ്റ്റിലായത്.
