കാസര്‍കോട്: തടവു പുള്ളികളെന്നാല്‍ സമൂഹത്തില്‍ നിന്നും മാറ്റി നിര്‍ത്തേണ്ടവരല്ലെന്നും പലരും സാഹചര്യങ്ങളുടെ സമ്മര്‍ദ്ദം മൂലമാണ് കുറ്റവാളികളായി മാറുന്നതെന്നും ഹോസ്ദുര്‍ഗ് സബ് ജയില്‍ സൂപ്രണ്ട് എന്‍. വേണു പറഞ്ഞു.
ഇവരെ സമൂഹത്തിലേക്ക് തിരിച്ചു കൊണ്ടു വരുന്നതിന് ലയണ്‍സ് ക്ലബ്ബ് പോലുള്ള സംഘടനകളുടെ പിന്തുണ വേണമെന്നും അദ്ദേഹം അഭിപ്രായപ്പെട്ടു.
ചന്ദ്രഗിരി ലയണ്‍സ് ക്ലബ്ബ് ഹോസ്ദുര്‍ഗ് സബ് ജയിലിലേക്ക് നല്‍കിയ വിനോദോപകരണങ്ങള്‍ ഏറ്റുവാങ്ങി സംസാരിക്കുകയായിരുന്നു അദ്ദേഹം.
തടവുകാരുടെ മാനസിക വിനോദത്തിനായി എല്ലാ സെല്ലിലേക്കും ഓരോ കാരം ബോര്‍ഡുകള്‍ നല്‍കി. അതോടൊപ്പം സാമ്പത്തികമായി പിന്നോക്കം നില്‍ക്കുന്ന പഠനം വഴിമുട്ടി നില്‍ക്കുന്ന തടവുകാരുടെ മക്കള്‍ക്ക് തുടര്‍ പഠനത്തിനുള്ള സഹായവും ലയണ്‍സ് ക്ലബ്ബ് ചെയ്യും.
ചന്ദ്രഗിരി ലയണ്‍സ് ക്ലബ്ബ് പ്രസിഡണ്ട് സി.എല്‍. റഷീദ് യോഗം ഉദ്ഘാടനം ചെയ്തു. ഐ.പി.പി ജലീല്‍ മുഹമ്മദ്, ഫാറൂഖ് കാസ്മി, അബ്ദുല്‍ ഖാദര്‍ തെക്കില്‍, ഷാഫി എ. നെല്ലിക്കുന്ന്, ഷരീഫ് കാപ്പില്‍, മഹമൂദ് എരിയാല്‍, ഷംസീര്‍ റസൂല്‍, എം.ടി.സുബൈര്‍ സംസാരിച്ചു. അസിസ്റ്റന്റ് സൂപ്രണ്ട് എം. ശ്രീനിവാസ് സ്വാഗതവും അസിസ്റ്റന്റ് പ്രിസണ്‍ ഓഫീസര്‍ സജിത്ത് നന്ദിയും പറഞ്ഞു.
