കാസര്‍കോട്: സെപ്തംബര്‍ 10 മുതല്‍ 19 വരെ ബറോഡയില്‍ നടക്കുന്ന ജെ.വൈ ലേലെ മെമ്മോറിയല്‍ അണ്ടര്‍-19 ഇന്‍വിറ്റേഷണല്‍ ക്രിക്കറ്റ് ടൂര്‍ണമെന്റിലേക്കുള്ള കേരള ടീമില്‍ അഭിജിത്ത് കെയും മുഹമ്മദ് കൈഫും ഇടം നേടി. അണ്ടര്‍-23 ജില്ലാ ടീം ക്യാപ്റ്റനും മുന്‍ തലശ്ശേരി കെ.സി.എ അക്കാദമി താരവുമായ അഭിജിത്ത് തുടര്‍ച്ചയായ മൂന്നാം തവണയാണ് കേരള ടീമില്‍ ഇടംനേടുന്നത്. മികച്ച ഓള്‍റൗണ്ടറായ അഭിജിത്ത് അണ്ടര്‍-16 എന്‍.സി.എ ക്യാമ്പിലും അണ്ടര്‍-16 കേരള ടീമിലും അംഗമായിരുന്നു. അഭിജിത്ത് കെ നീലേശ്വരം സ്വദേശിയാണ്. അണ്ടര്‍-19 ജില്ലാ ക്യാപ്റ്റനും മുന്‍ തലശ്ശേരി കെ.സി.എ അക്കാദമി താരവും മികച്ച വിക്കറ്റ് കീപ്പറും ഓപ്പണിംഗ് ബാറ്റ്‌സ്മാനുമായ മുഹമ്മദ് കൈഫ് മഞ്ചേശ്വരം സ്വദേശിയാണ്. കേരള ടീമില്‍ ഇടംനേടിയ അഭിജിത്ത് കെ, മുഹമ്മദ് കൈഫ് എന്നിവരെ കാസര്‍കോട് ജില്ലാ ക്രിക്കറ്റ് അസോസിയേഷന്‍ അഭിനന്ദിച്ചു.
