കാഞ്ഞങ്ങാട്: നഗരത്തില്‍ അനധികൃതമായി പാര്‍ക്ക് ചെയ്യുന്ന വാഹനങ്ങളെ പൂട്ടാന്‍ സംവിധാനം വരുന്നു. നടപ്പാതകളിലും നോ പാര്‍ക്കിംഗ് ഏരിയകളിലും വാഹനം പാര്‍ക്കു ചെയ്ത് പോകുന്നവരും ദൂര യാത്ര പോകുമ്പോള്‍ രാവിലെ മുതല്‍ വൈകുന്നേരം വരെ വാഹനം അലക്ഷ്യമായിടുന്നവരും ഇതോടെ കുടുങ്ങും. തിരികെയെത്തുമ്പോള്‍ അവിടെ വാഹനം ലോക്കിലായിരിക്കും. ട്രാഫിക് പരിഷ്‌ക്കരണത്തിന്റെ ഭാഗമായി നിയമപരമായ നടപടി ക്രമങ്ങള്‍ പൂര്‍ത്തികരിച്ചാലെ അനധികൃത പാര്‍ക്കിംഗില്‍ എര്‍പ്പെട്ട വാഹനം തിരികെ ഉടമസ്ഥന് ലഭിക്കുകയുള്ളു. അനധികൃത പാര്‍ക്കിങ്ങ് നിയന്ത്രിക്കുന്നതിന്റെ ഭാഗമായി കാഞ്ഞങ്ങാട് നഗരസഭയും പൊലീസും ഇത്തരം വാഹനങ്ങളെ പൂട്ടാന്‍ ലോക്ക് ഏര്‍പ്പെടുത്താന്‍ തീരുമാനിച്ചിരിക്കുകയാണ്. തിരക്കുപിടിച്ച നഗരത്തിലെ, നോ പാര്‍ക്കിംഗ് മേഖലകളിലും മറ്റും വാഹനം പാര്‍ക്ക് ചെയ്തുപോകുന്നവരെ തളയ്ക്കാന്‍ കാഞ്ഞങ്ങാട് നഗരസഭയും ട്രാഫിക് പൊലീസ് ആവിഷ്‌കരിച്ച നോ പാര്‍ക്കിംഗ് ഓപറേഷന്‍ കാഞ്ഞങ്ങാട് നഗരത്തില്‍ നടപ്പാക്കുകയാണ്. നടപ്പാതകള്‍ ഒഴിപ്പിച്ച് അവ പൂര്‍ണമായും കാല്‍നടയാത്രക്കാര്‍ക്ക് വിട്ടുകൊടുക്കുകയാണ് പദ്ധതിയുടെ ലക്ഷ്യം.
ഒരു ഓഫീസറുടെ നേതൃത്വത്തിലുള്ള ട്രാഫിക് പൊലീസ് ടീം റിക്കവറി വാനുമായി നഗരത്തില്‍ ചുറ്റിക്കറങ്ങിക്കൊണ്ടിരിക്കും. അനധികൃത പാര്‍ക്കിംഗ് എവിടെ ശ്രദ്ധയില്‍പ്പെട്ടാലും വാഹനം കൊളുത്തിവലിച്ച് നീക്കും. നിയമലംഘനത്തിന് ഈ ടീം പിഴ സ്വീകരിക്കില്ല. നഗരത്തില്‍ അനവധി പാര്‍ക്കിംഗ് മേഖലകള്‍ ഉണ്ടായിട്ടും തോന്നുന്നിടത്ത് വാഹനം പാര്‍ക്കുചെയ്ത് ഗതാഗതം തടസപ്പെടുത്തുന്ന പ്രവണത വര്‍ധിച്ചു വരുന്നതിനാലാണ് ‘നോ പാര്‍ക്കിംഗ് ഓപറേഷന്‍’ ആരംഭിക്കുന്നതെന്ന് അധികൃതര്‍ പറഞ്ഞു.
