കാസര്‍കോട്: രണ്ടാമത് കാസര്‍കോട് അന്താരാഷ്ട്ര ചലച്ചിത്രോത്സവം ഡിസംബര്‍ 29, 30, 31 തീയതികളില്‍ നടക്കും. നേരത്തെ ഈമാസം നടത്താന്‍ നിശ്ചയിച്ചിരുന്ന ചലച്ചിത്രോത്സവവും ഹൃസ്വ ചിത്ര മത്സരവും കേരളത്തെ ബാധിച്ച പ്രളയ ദുരന്തം കാരണം മാറ്റിവെക്കുകയായിരുന്നു. കാസര്‍കോടിനൊരിടം സംഘടിപ്പിക്കുന്ന രണ്ടാമത് അന്താരാഷ്ട്ര ചലച്ചിത്രോത്സവത്തിന് മുനിസിപ്പല്‍ കോണ്‍ഫറന്‍സ് ഹാള്‍, വനിതാ ഭവന്‍ എന്നിവയായിരിക്കും വേദിയാവുക. അക്കാദമിക് അവാര്‍ഡുകള്‍ നേടിയതടക്കമുള്ള ലോക ഭാഷാ ചിത്രങ്ങള്‍ പ്രദര്‍ശനത്തിനുണ്ടാവും. ഷോര്‍ട്ട് മൂവി മത്സര വിഭാഗവും ഉണ്ട് എന്നതാണ് ഇപ്രാവശ്യത്തെ പ്രത്യേകത. കഴിഞ്ഞ വര്‍ഷം അരങ്ങേറിയ പ്രഥമ ചലച്ചിത്രോത്സവം പങ്കാളിത്തം കൊണ്ടും സംഘാടക മികവ് കൊണ്ടും ഏറെ ശ്രദ്ധേയമായിരുന്നു. നിരവധി പ്രവര്‍ത്തനങ്ങളും ഇടപെടലുകളും കൊണ്ട് പൊതു ജനങ്ങള്‍ക്കിടയില്‍ സ്വീകാര്യമായ കാസര്‍കോടിനൊരിടം കൂട്ടായ്മ സംഘടിപ്പിക്കുന്ന ചലച്ചിത്ര മേള ആയത് കൊണ്ട് തന്നെ ഏറെ പ്രതീക്ഷയോടെ ചലച്ചിത്ര മേളയുടെ ഉത്സവാന്തരീക്ഷം കാത്തിരിക്കുകയാണ് സിനിമാ പ്രേമികള്‍. സിനിമാ സാംസ്‌കാരിക സാഹിത്യ രംഗത്തെ പ്രമുഖര്‍ മേളയുടെ ഭാഗമാകും എന്നതും ഇത്തവണ മേളയെ കൂടുതല്‍ ജനകീയമാക്കും. ഷോര്‍ട്ട് മൂവി അവാര്‍ഡുകള്‍ക്കായി കേരളത്തിനകത്തും പുറത്തുനിന്നുമുള്ള ചിത്രങ്ങള്‍ ക്ഷണിച്ചു തുടങ്ങി. തിരഞ്ഞെടുക്കുന്ന ചിത്രങ്ങള്‍ക്ക് പ്രൈസ് മണി, പ്രശസ്തി പത്രം, ഉപഹാരം എന്നിവ നല്‍കും. നോമിനേഷന്‍ നേടുന്ന ചിത്രങ്ങളുടെ പ്രദര്‍ശനവും ഉണ്ടാവും.
