കാസര്‍കോട്: ഡല്‍ഹി പൊലീസ് വിട്ടയച്ച മേല്‍പ്പറമ്പ് സ്വദേശിയും കൂട്ടാളിയും കര്‍ണാടക ക്രൈംബ്രാഞ്ചിന്റെ കസ്റ്റഡിയില്‍. മേല്‍പറമ്പ് ചെമ്പരിക്കയിലെ തസ്ലീമിനെ(38)യും സുഹൃത്തിനെയുമാണ് കര്‍ണാടക ക്രൈംബ്രാഞ്ച് തിങ്കളാഴ്ച രാത്രി കാസര്‍കോട്ട് നിന്നും കസ്റ്റഡിയിലെടുത്തത്. സാമ്പത്തിക കുറ്റകൃത്യവുമായി ബന്ധപ്പെട്ടാണ് ഇരുവരും പിടിയിലായതെന്നാണ് വിവരം. രണ്ടുപേരെയും ക്രൈംബ്രാഞ്ച് വിശദമായി ചോദ്യം ചെയ്തുവരികയാണ്.
ഒരു ഇടപാട് നടത്താനുണ്ടെന്ന് പറഞ്ഞ് ക്രൈംബ്രാഞ്ച് തന്ത്രപൂര്‍വം ഇവരെ വിളിക്കുകയായിരുന്നു. എന്നാല്‍ വിളിച്ചത് ക്രൈംബ്രാഞ്ചാണെന്നറിയാതെ തസ്ലീം സുഹൃത്തിനെയും കൂട്ടി കാറില്‍ കര്‍ണാടകയിലെത്തുകയാണുണ്ടായത്. മുമ്പ് തസ്ലീമിനെ ഡല്‍ഹി പൊലീസ് ദേശീയ സുരക്ഷയുമായി ബന്ധപ്പെട്ട കേസില്‍ കസ്റ്റഡിയിലെടുത്തിരുന്നുവെങ്കിലും മതിയായ തെളിവുകള്‍ ലഭിക്കാത്തതിനാല്‍ വിട്ടയച്ചിരുന്നു. നേരത്തെ ദുബായിലായിരുന്നപ്പോള്‍ ദുബായ് പൊലീസിന്റെയും ഇന്ത്യന്‍ രഹസ്യാന്വേഷണ ഏജന്‍സിയായ റോയുടെയും ഏജന്റായി പ്രവര്‍ത്തിച്ചിരുന്നുവെന്നായിരുന്നു തസ്ലിം അവകാശപ്പെട്ടിരുന്നത്. റോയുടെ തിരിച്ചറിയല്‍ കാര്‍ഡും തസ്ലിമിന്റെ കൈയില്‍ നിന്ന് പിടികൂടിയിരുന്നു. തസ്ലീമിനെയും സുഹൃത്തിനെയും ആരോ തട്ടികൊണ്ടു പോയതാണെന്ന് സംശയിച്ച് ബന്ധുക്കള്‍ മേല്‍പ്പറമ്പ് പൊലീസില്‍ പരാതി നല്‍കാനായി എത്തിയെങ്കിലും കര്‍ണാടകക്രൈംബ്രാഞ്ചിന്റെ കസ്റ്റഡിയിലാണുള്ളതെന്ന് വ്യക്തമായതോടെ പരാതിയില്‍ നിന്ന് പിന്‍മാറി.
