കാസര്‍കോട്: ദേശീയപാതയുടെ തകര്‍ച്ചയെ തുടര്‍ന്ന് രാജ്‌മോഹന്‍ ഉണ്ണിത്താന് എം.പി. നടത്തിയ 24 മണിക്കൂര്‍ നിരാഹാര സമരം സര്‍ക്കാറിന്റെ കണ്ണ് തുറപ്പിച്ചിരിക്കുകയാണെന്നും ഈ സമര വിജയം ജനങ്ങളുടെ വിജയമാണെന്നും പ്രതിപക്ഷ നേതാവ് രമേശ് ചെന്നിത്തല പറഞ്ഞു. നിരാഹാര സമരത്തിന്റെ സമാപന ചടങ്ങില്‍ രാജ്‌മോഹന്‍ ഉണ്ണിത്താന് നാരങ്ങാനീര് നല്‍കി സമരം അവസാനിപ്പിച്ച ശേഷം സംസാരിക്കുകയായിരുന്നു അദ്ദേഹം.
തകര്‍ന്ന് കിടക്കുന്ന ദേശീയ പാതയിലെ യാത്ര അത്യന്തം ദയനീയാണ്.
ഈ സമരം ജനങ്ങള്‍ക്ക് വേണ്ടിയായിരുന്നു. റോഡുണ്ടായാല്‍ മാത്രമേ വികസനം ഉണ്ടാവുകയുള്ളു. കേന്ദ്ര സര്‍ക്കാറിന്റെ ശ്രദ്ധയില്‍ പോലും കാര്യങ്ങള്‍ കൊണ്ടുവരാതെ അവരെ വെള്ളപൂശുകയാണ് ഇടത് സര്‍ക്കാര്‍ ചെയ്തത്. ജനങ്ങള്‍ക്ക് സഹിക്കുന്നതിന് പരിധിയുണ്ട്. ഒടുവില്‍ എം.പി തന്നെ സമരത്തിന് മുന്നിട്ടിറങ്ങേണ്ടി വന്നു. അതിന് ഫലം കണ്ടു. 26ന് ഡല്‍ഹിയില്‍ റോഡ്‌സ് വിഭാഗത്തിന്റെ ചുമതലയുള്ള അഡീ.ഡയറക്ടര്‍ ബാലകൃഷ്ണനുമായി എം.പിയെ ചര്‍ച്ചയ്ക്കായി ക്ഷണിച്ചിരിക്കുകയാണെന്നും ചെന്നിത്തല പറഞ്ഞു.
യു.ഡി.എഫ് ചെയര്‍മാന്‍ എം.സി ഖമറുദ്ദീന്‍ അധ്യക്ഷത വഹിച്ചു. കണ്‍വീനര്‍ എ.ഗോവിന്ദന്‍ നായര്‍ സ്വാഗതം പറഞ്ഞു. കൊടിക്കുന്നില്‍ സുരേഷ് എം.പി., കെ.പി.കുഞ്ഞിക്കണ്ണന്‍, സി.ടി.അഹമ്മദലി, ഹക്കീം കുന്നില്‍, അഡ്വ. സി.കെ. ശ്രീധരന്‍, കെ. നീലകണ്ഠന്‍, ജി. രതി കുമാര്‍, എ.ജി.സി.ബഷീര്‍, അഡ്വ. ബി.സുബ്ബയ്യ റൈ, ഖാദര്‍ മാങ്ങാട്, അഡ്വ.ഗോവിന്ദന്‍ നായര്‍, പി.കെ.ഫൈസല്‍, പി. വി. സുരേഷ്, സാജിദ് മൗവ്വല്‍, സി. വി. ജെയിംസ്, വിനോദ് കുമാര്‍ പള്ളയില്‍ വീട്, ബാലകൃഷ്ണന്‍ പെരിയ, കല്ലട്ര മാഹിന്‍ ഹാജി തുടങ്ങിയവര്‍ സംബന്ധിച്ചു.
