കാസര്‍കോട്: കാസര്‍കോട്ടു നിന്ന് ഐ.എസില്‍ ചേര്‍ന്ന സംഘത്തിലെ എട്ടു പേര്‍ അമേരിക്കന്‍ വ്യോമാക്രമണത്തില്‍ കൊല്ലപ്പെട്ടെന്ന് എന്‍.ഐ.എ സ്ഥിരീകരണം. എട്ടുപേരും കൊല്ലപ്പെട്ടതായുള്ള വിവരം നേരത്തെ ലഭിച്ചിരുന്നെങ്കിലും എന്‍.ഐ.എ ഇപ്പോഴാണ് ഇക്കാര്യം സ്ഥിരീകരിക്കുന്നത്. കാസര്‍കോട് ജില്ലയിലെ പടന്ന സ്വദേശികളായ മുഹമ്മദ് മുര്‍ഷിദ്, ഹഫീസുദ്ദീന്‍, ഷിഹാസ്, അജ്മല, തൃക്കരിപ്പൂരിലെ മുഹമ്മദ് മര്‍വന്‍, ഇളമ്പച്ചിയിലെ മുഹമ്മദ് മന്‍ഷാദ്, പാലക്കാട് സ്വദേശികളായ ബാസ്റ്റിന്‍, ഷിബി എന്നിവരാണ് വിവിധ ഘട്ടങ്ങളിലായി ഐ.എസ് കേന്ദ്രത്തില്‍ അമേരിക്ക നടത്തിയ ആക്രമണങ്ങളില്‍ കൊല്ലപ്പെട്ടത്. അഫ്ഗാനിസ്ഥാനിലെ കിഴക്കന്‍ നംഗര്‍ഹാര്‍ പ്രവിശ്യയില്‍ അമേരിക്ക നടത്തിയ വ്യോമാക്രമണത്തിലാണ് ഇവര്‍ കൊല്ലപ്പെട്ടതെന്നാണ് കേരള പൊലീസിനെ എന്‍.ഐ.എ അറിയിച്ചത്. കൂടുതല്‍ നടപടികള്‍ക്കായി എന്‍.ഐ.എ അഫ്ഗാന്‍ സര്‍ക്കാരുമായി ബന്ധപ്പെട്ടിട്ടുണ്ട്. തൃക്കരിപ്പൂര്‍ ഉടുമ്പുന്തലയിലെ അബ്ദുല്‍ റാഷിദ് അബ്ദുല്ലയുടെ നേതൃത്വത്തില്‍ ഐ.എസില്‍ ചേര്‍ന്ന 23 പേരില്‍ പിന്നീട് കൊല്ലപ്പെട്ട എട്ടുപേരും ഉള്‍പ്പട്ടിരുന്നു. അബ്ദുല്‍ റാഷിദും ഒപ്പമുള്ളവരും ടെലഗ്രാമിലൂടെ പല ഘട്ടങ്ങളായി ബന്ധുക്കളെ അറിയിച്ച മരണങ്ങളാണ് സ്ഥിരീകരിക്കപ്പെടുന്നത്. അതേ സമയം അബ്ദുല്‍ റാഷിദ് 2 മാസം മുന്‍പ് വ്യോമാക്രമണത്തില്‍ കൊല്ലപ്പെട്ടതായി ബന്ധുക്കള്‍ക്ക് വിവരം ലഭിച്ചെങ്കിലും എന്‍.ഐ.എ സ്ഥിരീകരിച്ച എട്ടു പേരുടെ പട്ടികയില്‍ ഇല്ല. 2016 ജൂണ്‍ മുതലാണ് ഐ.എസില്‍ ചേരാനായി ഇവര്‍ സംസ്ഥാനം വിട്ടത്.
