മൊഗ്രാല്‍ പുത്തൂര്‍: മൊഗ്രാല്‍ പുത്തൂര്‍ ഗ്രാമ പഞ്ചായത്തിലെ പടിഞ്ഞാര്‍,കടവത്ത്,മൊഗര്‍ തുടങ്ങിയ സ്ഥലങ്ങളിലെ കിണര്‍ വെള്ളത്തില്‍ കോളിഫോം ബാക്ടീരിയുടെ സാന്നിധ്യം കൂടിയ തോതില്‍ കണ്ടെത്തിയതിനാല്‍ വെള്ള ശുദ്ധികരണത്തിനായി കുടുംബാരോഗ്യകേന്ദ്രത്തിന്റെ നേതൃത്വത്തില്‍ ക്ലേറിനേഷന്‍ കാമ്പയിന്‍ ആരംഭിച്ചു. ജലശക്തി അഭിയാന്റെ ഭാഗമായാണ് കുടിവെള്ളം പരിശോധന നടത്തിയത്. കുടിവെള്ളത്തില്‍ കോളിഫോം ബാക്ടീരിയ ഒട്ടും ഉണ്ടാവാന്‍ പാടില്ല. മനുഷ്യന്റെയും മൃഗങ്ങളുടേയും മലത്തില്‍ കാണപ്പെടുന്ന ഈ ബാക്ടീരിയ ഈ പ്രദേശത്തെ കിണറുകളില്‍ ഒരു മില്ലി ലിറ്റര്‍ വെള്ളത്തില്‍ 1100 പ്ലസ് ആണ്. മഞ്ഞപിത്തം, ടൈഫോയിഡ്, വയറിളക്കരോഗങ്ങള്‍, ഭക്ഷ്യ വിഷബാധ തുടങ്ങിയ രോഗങ്ങള്‍ക്ക് ഇത് കാരണമാവും. 20 മിനിറ്റ് നേരം തിളപ്പിച്ച് ആറിയ വെള്ളം ഉപയോഗിക്കുക, അള്‍ട്രവൈലറ്റ് (യു.വി) ഫില്‍ട്ടര്‍ ഉപയോഗിക്കുക. ബ്ലീച്ചിംഗ് പൗഡര്‍ ഉപയോഗിച്ച് ക്ലേറിനേഷന്‍ നടത്തുക എന്നിവ ശ്രദ്ധിക്കണം. 1000 ലിറ്റര്‍ വെള്ളത്തിന് 2.5 ഗ്രാം ബീച്ചിംഗ് പൗഡറാണ് ഉപയോഗിക്കേണ്ടത്. പടിഞ്ഞാറില്‍നടത്തിയ ബോധവല്‍ക്കരണ പരിപാടിയില്‍ ഹെല്‍ത്ത് ഇന്‍സ്‌പെക്ടര്‍ ബി.അഷറഫ് ക്ലാസ്സെടുത്തു. ആസ്പത്രി മാനേജ്‌മെന്റ് കമ്മിറ്റി അംഗം മാഹിന്‍കുന്നില്‍, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ എ.കെ.സുന്ദരന്‍, കെ.രഞ്ജീവ രാഘവന്‍, നാട്ടുകാരായ ബഷീര്‍ പി.ബി, ഷഫീക്ക് പി.ബി, അബൂബക്കര്‍, കമാല്‍, മെയ്തീന്‍, ഷാഫി, നവാസ്, അമീര്‍കോട്ടക്കുന്ന് എന്നിവര്‍ നേതൃത്വം നല്‍കി. മൊഗറില്‍ പി.എസ്. ഫസല്‍, എസ്.കെ. മുഹമ്മദ് അലി, ഷരീഫ്, എം.പി ഹംസ, കരീം, എന്നിവര്‍ നേതൃത്വം നല്‍കി.
