ബദിയടുക്ക: സുഹൃത്തുക്കള്‍ക്കൊപ്പം കുളിക്കാനിറങ്ങിയ വിദ്യാര്‍ത്ഥി പുഴയില്‍ മുങ്ങി മരിച്ചു. ധര്‍മ്മത്തടുക്ക ബി.കെ. ഹൗസിലെ ഇബ്രാഹിം-ദൈനബ ദമ്പതികളുടെ മകനും എസ്.ടി.പി ഹയര്‍ സെക്കണ്ടറി സ്‌കൂള്‍ പ്ലസ് വണ്‍ വിദ്യാര്‍ത്ഥിയുമായ അബൂബക്കര്‍ സിദ്ദീഖ്(17)ആണ് മരിച്ചത്. ശനിയാഴ്ച ഉച്ചയ്ക്ക് ഒന്നര മണിയോടെ നാല് സുഹൃത്തുക്കളുമൊത്ത് വീട്ടില്‍ നിന്നും ഒരു കിലോ മീറ്റര്‍ അകലെയുള്ള ചള്ളങ്കയം പുഴയില്‍ കുളിക്കാനിറങ്ങിയതായിരുന്നു. കുളി കഴിഞ്ഞ് മൂന്ന് പേര്‍ മുകളില്‍ കയറിയെങ്കിലും സിദ്ദിഖിനെ കണ്ടില്ല. ഇതോടെ മൂന്ന് പേരും നിലവിളിച്ച് ഓടി. നിലവിളി കേട്ട് നാട്ടുകാര്‍ ഓടിയെത്തി പുഴയില്‍ തിരച്ചില്‍ നടത്തിയെങ്കിലും സിദ്ദിഖിനെ കണ്ടെത്താനായില്ല. പിന്നിട് ഉപ്പളയില്‍ നിന്നുമെത്തിയ ഫയര്‍ഫോഴ്‌സ് തിരച്ചില്‍ നടത്തി സിദ്ദിഖിനെ പുറത്തെടുത്ത് ബന്തിയോട്ടെ സ്വകാര്യ ആസ്പത്രിയിലേക്ക് കൊണ്ട് പോകുന്നതിനിടെ മരണപ്പെട്ടു. ഡോക്ടര്‍ മരണം സ്ഥിരീകരിച്ചതിന് ശേഷം മൃതദേഹം പോസ്റ്റ്‌മോര്‍ട്ടത്തിനായി മംഗല്‍പാടി ആസ്പത്രിയിലേക്ക് മാറ്റി. സഹോദരങ്ങള്‍: ലത്തീഫ് (ദുബായ്), ബാത്തിഷ, സുഹൈല്‍, മിസ്‌രിയ, സുനൈന, മഹ്‌രിഫ.
