കാസര്‍കോട്: പാരമ്പര്യ നാട്ടറിവുകളും നാട്ടുവൈദ്യവും നാട്ടില്‍ നിലനിര്‍ത്തേണ്ട ആവശ്യകതയെക്കുറിച്ച് സമൂഹത്തെ ബോധവത്കരിക്കാനായി വൈദ്യമഹാസഭ, ജനാരോഗ്യ പ്രസ്ഥാനം എന്നിവയുടെ സംയുക്താഭിമുഖ്യത്തില്‍ സംസ്ഥാനതല പ്രചാരണ വാഹനയാത്ര നടത്തുമെന്ന് ഭാരവാഹികള്‍ പത്രസമ്മേളനത്തില്‍ അറിയിച്ചു. നവംബര്‍ ഒന്നിന് കാസര്‍കോട് നിന്നാരം ഭിക്കുന്ന യാത്ര നവംബര്‍ 14ന് പാറശാലയില്‍ സമാപിക്കും. നാട്ടുവൈദ്യത്തിന്റേയും നാട്ടറിവുകളുടേയും നന്മകളും അനന്ത സാധ്യതകളും സമൂഹത്തിലെത്തിക്കുകയാണ് യാത്രയുടെ ലക്ഷ്യം.
കാന്‍സര്‍ പ്രതിരോധത്തിനായി രാജീവ്ഗാന്ധി ബയോടെക്‌നോളജി സെന്ററില്‍ 400ല്‍ അധികം മരുന്ന് ഉപയോഗിച്ച് ഗവേഷണം നടക്കുന്നുണ്ട്. പാരമ്പര്യനാട്ടുവൈദ്യവും നാട്ടറിവുകളും നിലനിന്നതിനാല്‍ സമൂഹത്തിന് ലഭിച്ച ഒരു പ്രയോജനമാണിത്. പരമ്പരാഗത അറിവുകള്‍ നിലനിര്‍ത്താനായാല്‍ ഇന്നല്ലെങ്കില്‍ നാളെ അത്തരം അറിവുകള്‍ സമൂഹത്തിന് പ്രയോജനം ചെയ്യും.
സാധാരണക്കാരന് ചെലവില്ലാതെ ചികിത്സയ്ക്ക് ഉപയോഗിക്കാവുന്ന ആയിരക്കണക്കിന് മരുന്നറിവുകളാണ് നമ്മുടെ വൈദ്യന്മാര്‍ക്കിടയിലും സാധാരണക്കാര്‍ക്കിടയിലുമുള്ളത്. ഇത്തരം അറിവുകള്‍ നിലനിര്‍ത്തുകയും അടുത്ത തലമുറയ്ക്കായി കൈമാറുകയും ചെയ്യണം. ഇത് സമൂഹത്തോടുചെയ്യുന്ന നീതിയാണ്. ഇതിനൊപ്പം നാട്ടുവൈദ്യത്തിന്റെ നന്മകളും അനന്തസാധ്യതകളും സമൂഹത്തിലെത്തിക്കാന്‍ പ്രചാരണയാത്ര ശ്രമിക്കും.
നവംബര്‍ ഒന്നിന് രാവിലെ പത്തിന് കാസര്‍കോട് ഉപ്പള നിത്യാനന്ദ യോഗാശ്രമത്തില്‍ നടക്കുന്ന ചടങ്ങില്‍ ഉപ്പള നിത്യാനന്ദാശ്രമം മഠാധിപതി സ്വാമി യോഗാനന്ദസരസ്വതി പ്രചാരണ വാഹനയാത്ര ഉദ്ഘാടനം ചെയ്യും. വൈദ്യമഹാസഭ കാസര്‍കോട് ജില്ലാ ചെയര്‍മാന്‍ അഡ്വ. ടി.കെ. സുധാകരന്‍ അധ്യക്ഷത വഹിക്കും.
വൈദ്യമഹാസഭ സംസ്ഥാനചെയര്‍മാന്‍ മാന്നാര്‍ ജി. രാധാകൃഷ്ണന്‍ വൈദ്യര്‍ യാത്രാലക്ഷ്യം വിശദീകരിക്കും. വൈദ്യമഹാസഭ ജനറല്‍ കണ്‍വീനര്‍ ടി. ശ്രീനിവാസന്‍, കോ-ഓര്‍ഡിനേറ്റര്‍ എല്‍. പങ്കജാക്ഷന്‍, ജനാരോഗ്യപ്രസ്ഥാനം ജനറല്‍ കണ്‍വീനര്‍ കെ.വി. സുഗതന്‍ തുടങ്ങിയവര്‍ പ്രസംഗിക്കും. മടിക്കൈ കുമാരന്‍ വൈദ്യര്‍ സ്വാഗതവും കരുണാകരന്‍ കുന്നത്ത് നന്ദിയും പറയും.
വൈകിട്ട് മൂന്നിന് കാഞ്ഞങ്ങാട് നടക്കുന്ന സ്വീകരണ യോഗം ജേക്കബ് വടക്കന്‍ചേരി ഉദ്ഘാടനം ചെയ്യും. അരയി നാരായണന്‍ വൈദ്യര്‍, മടിക്കൈ കുമാരന്‍ വൈദ്യര്‍, അമ്പലത്തറ കുഞ്ഞികൃഷ്ണന്‍ എന്നിവരെ ആദരിക്കും. പ്രമുഖ നാട്ടുചികിത്സകന്‍ വടകര വി.ടി. ശ്രീധരന്‍ വൈദ്യര്‍, ആചാര്യ ജോര്‍ജ് ജേക്കബ് (മുംബൈ) തുടങ്ങിയവര്‍ ചികിത്സാ ക്യാമ്പിനും ബോധവത്കരണ ക്ലാസിനും നേതൃത്വം നല്‍കും.
ഡിസംബര്‍ ഏഴുമുതല്‍ 15 വരെ തിരുവനന്തപുരത്ത് നടക്കുന്ന വൈദ്യമഹാസമ്മേളനത്തിന്റെ പ്രചാരണഭാഗമായാണ് യാത്ര നടത്തുന്നത്. യാത്രക്ക് വിവിധ പാരമ്പര്യ വൈദ്യസംഘടനകള്‍, സന്നദ്ധ സാമൂഹിക സംഘടനകള്‍, സാംസ്‌കാരിക പ്രസ്ഥാനങ്ങള്‍ തുടങ്ങിയവര്‍ പങ്കാളിയാകുമെന്ന് വൈദ്യമഹാസഭ സംസ്ഥാന ജനറല്‍ കണ്‍വീനര്‍ ടി. ശ്രീനിവാസന്‍ പത്രസമ്മേളനത്തില്‍ അറിയിച്ചു. മടിക്കൈ കുമാരന്‍ വൈദ്യര്‍, പോള്‍ മാസ്റ്റര്‍, ശേഖര്‍ പി. ബേക്കല്‍ തുടങ്ങിയവരും പത്രസമ്മേളനത്തില്‍ പങ്കെടുത്തു.
