കാസര്‍കോട്: കാസര്‍കോടിന്റെ മരുമകന്‍ സുഹൈല്‍ പരപ്പനങ്ങാടി ശ്രീലങ്കക്കെതിരായ 3 ഏകദിനത്തിനുള്ള ഇന്ത്യന്‍ ബധിര ക്രിക്കറ്റ് ടീമില്‍. പരപ്പനങ്ങാടി പുത്തരിക്കല്‍ പരേതനായ അബ്ദുല്‍ റസാഖ് ഹാജിയുടെയും ആസ്യയുടെയും മൂന്നാമത്തെ മകനായ സുഹൈല്‍ സാമൂഹ്യ പ്രവര്‍ത്തകന്‍ ഷരീഫ് കാപ്പിലിന്റെ മകള്‍ ഫാത്തിമ ഷിറിന്റെ ഭര്‍ത്താവാണ്. നേരത്തെ കേരളത്തിന് വേണ്ടി ദേശീയ സൗത്ത് സോണ്‍ ചാംപ്യന്‍ഷിപ്പുകളില്‍ കേരള ഡെഫ് ടീം ക്യാപ്റ്റനായി മികച്ച പ്രകടനം കാഴ്ച വെച്ചിരുന്നു. ദേശീയ ടീമില്‍ കളിക്കുക എന്നത് സുഹൈലിന്റെ വലിയ സ്വപ്‌നങ്ങളിലൊന്നായിരുന്നു. ഇന്ത്യന്‍ ക്യാമ്പില്‍ പരിശീലനത്തിനായി നാളെ ഡല്‍ഹിയിലേക്ക് പുറപ്പെടും. 28 മുതലാണ് ശ്രീലങ്കയുമായുള്ള മത്സരങ്ങള്‍ ആരംഭിക്കുക. ഇതാദ്യമായാണ് ഒരു മലയാളി ഇന്ത്യന്‍ ബധിര ടീമില്‍ ഇടം പിടിക്കുന്നത്.
തിരൂരങ്ങാടി ഡെഫ് ചലഞ്ചേര്‍സ് ക്ലബ്ബിന്റെ താരമായ സുഹൈല്‍ നിരവധി തവണ മലപ്പുറത്തെ സ്റ്റേറ്റ് ക്രിക്കറ്റ് ചാമ്പ്യന്മാരാകുന്നതില്‍ നിര്‍ണായക പങ്കു വഹിച്ചിട്ടുണ്ട്. കേരള ക്രിക്കറ്റ് അസോസിയേഷന്റെ അണ്ടര്‍ 19, 22, 25 ക്യാമ്പുകളില്‍ താരമായിരുന്നു. കഴിഞ്ഞ വര്‍ഷം കാസര്‍കോട്ട് നടന്ന ജില്ലാ ക്രിക്കറ്റ് ലീഗ് എ ഡിവിഷന്‍ ടൂര്‍ണമെന്റില്‍ നാസ്‌ക് നയമാര്‍മൂലയ്ക്കു വേണ്ടി മികച്ച പ്രകടനം കാഴ്ചവെച്ചു. പരപ്പനങ്ങാടി കോ-ഓപ്പറേറ്റീവ് സര്‍വീസ് ബാങ്ക് ജീവനക്കാരനാണ്. കാസര്‍കോട് സ്വദേശിനി ഫാത്തിമ ഷിറിന്‍ കാപ്പിലാണ് ഭാര്യ. മക്കള്‍: അലേഹ സൈനബ്, ഇമാദ് അബ്ദുല്ല.
