ചിലരുടെ വേര്‍പാട് പെട്ടന്നൊന്നും പരിഹരിക്കാന്‍ സാധിക്കാതെ വിടവായി കാലങ്ങളോളം അവശേഷിക്കാറുണ്ട് എന്നത് ഒരു സത്യമാണ്. അത്തരക്കാരുടെ വേര്‍പാടുകള്‍ സമൂഹത്തിനും നാട്ടിനും പരിഹരിക്കുവാന്‍ സാധിക്കാത്ത നഷ്ടമായി കാലങ്ങളോളം നിലനില്‍ക്കാറുണ്ട്. ‘അത്തരത്തിലുള്ള ഒരു ജനനേതാവിന്റെ നഷ്ടമാണ് രണ്ടാണ്ടുകള്‍ക്ക് മുമ്പ് സംഭവിച്ചിരിക്കുന്നത്. ഒരു പുരുഷായുസ്സ് മുഴുവന്‍ കാലം മത-രാഷ്ട്രീയ-സാമൂഹ്യ-സാംസ്‌കാരിക മേഖലകളില്‍ നിറഞ്ഞു നിന്ന ചെര്‍ക്കളം അബ്ദുല്ല എന്ന കാസര്‍കോട്ടെ കാരണവര്‍ വിട പറഞ്ഞൊഴിഞ്ഞ ഓര്‍മ്മകള്‍ ഇന്നും ജനഹൃദയങ്ങളെ ദുഃഖിപ്പിക്കുന്നു. ഹരിത രാഷ്ട്രീയത്തിന്റെ വാനിലുദിച്ച് ചേര്‍ന്ന് ഉത്തരമലബാറിന്റെ മേല്‍വിലാസമായി മാറിയ ജനനായകന്റഎ വേര്‍പാട് ഒരു നാടിന്റെ, സമുദായത്തിന്റെ, സമൂഹത്തിന്റെ അലട്ടുന്ന വേദനയായി. സ്വന്തം നാടിനെ പേരിനോട് ചേര്‍ത്തു വെച്ച ചെര്‍ക്കളം അബ്ദുല്ല ഇന്നും ജനമനസ്സുകളില്‍ മായാത്ത ഓര്‍മ്മയാണ്.
കനല്‍പാതകള്‍ താണ്ടിയാണ് ചെര്‍ക്കളം നടന്നുവന്നത്. അതൊരു ഉയരത്തിലേക്കുള്ള കയറ്റം തന്നെയായിരുന്നു. ചെന്നവസാനിച്ചത് മന്ത്രി പദത്തിലേക്ക് മാത്രമായിരുന്നില്ല, അനേകായിരം ജനങ്ങളുടെ ഹൃദയത്തിന്റെ അടിത്തട്ടിലായിരുന്നു. തന്റേടവും ആര്‍ജ്ജവവും കാര്യപ്രാപ്തിയുമുള്ള നേതാവെന്ന് ചെര്‍ക്കളത്തെ കാലം വിളിച്ചത് നേരം പോക്കിനല്ല. എവിടെയും ചങ്കൂറ്റത്തോടെ, ആത്മധൈര്യത്തോടെ കയറി ചെല്ലാനുള്ള ആ കഴിവ് അദ്ദേഹത്തിന്റെ മുഖമുദ്ര തന്നെയായിരുന്നു. അദ്ദേഹത്തിന് ശരിയെന്ന് തോന്നുന്ന കാര്യം ആരുടെയും മുഖം നോക്കാതെ പറയേണ്ടിടത്ത് പറയേണ്ടത് പോലെ പറയാന്‍ ആര്‍ജ്ജവം കാട്ടിയ ചെര്‍ക്കളം ഒരിടത്തും മുട്ടുവിറച്ച് നില്‍ക്കാതെ തന്റേടം കാട്ടിയിരുന്നു.
മുസ്ലിം വിദ്യാര്‍ത്ഥി പ്രസ്ഥാനത്തിലൂടെ ഹരിത രാഷ്ട്രീയത്തിലേക്ക് കാലെടുത്തു വെച്ച ചെര്‍ക്കളം സ്വപ്രയത്‌നം കൊണ്ടാണ് മരണം വരെ മുസ്ലിം ലീഗിന്റെ അമരത്ത് നിറഞ്ഞു നിന്നത്.
‘ഹരിത രാഷ്ട്രീയത്തിന്റെ ജില്ലയിലെ കാവലാളായി മരണം വരെ ഉറച്ച അദ്ദേഹം മുസ്ലിം ലീഗിന് മാത്രമല്ല മറ്റു നേതാക്കള്‍ക്കിടയില്‍ പോലുംവിശ്രമമില്ലാത്ത ജനനേതാവായിരുന്നു.
ഏത് കാര്യത്തെയാണ് അദ്ദേഹത്തെ ചുമതലപ്പെടുത്തിയതെങ്കില്‍ ആ കാര്യം തീര്‍ച്ചയായും വിജയിപ്പിച്ചല്ലാതെ വിശ്രമമുണ്ടാകില്ല. അതായിരുന്നു ചെര്‍ക്കളത്തിന്റെ പ്രത്യേകത. മറ്റൊരു നേതാവിനും സാധിക്കാത്ത കൃത്യനിഷ്ഠത ചെര്‍ക്കളത്തിന്റെ കൂടെപ്പിറപ്പെന്ന് വേണം പറയാന്‍. ചെറുതും വലുതുമായ ഏത് പരിപാടി ഏറ്റെടുത്താലും സമയനിഷ്ഠത പാലിച്ചെത്തുന്ന നേതാവാരാണെന്ന് ചോദിച്ചാല്‍ മരണം വരെ അത് ചെര്‍ക്കളം എന്ന ഉത്തരമേ ലഭിച്ചിരുന്നുള്ളു. ചെര്‍ക്കളം എന്ന ധന്യജീവിതത്തിന്റെ വേര്‍പാട് അദ്ദേഹം കൈകാര്യം ചെയ്ത എല്ലാ മേഖലകളിലും ഇന്നും ശൂന്യമായി കിടക്കുകയാണ്. ഹരിത രാഷ്ട്രീയത്തിന് ധീരമായ നേതൃത്വം നല്‍കിയ ചെര്‍ക്കളം അടയാളപ്പെടുത്തിവെച്ച കാര്യങ്ങള്‍ അദ്ദേഹം മറഞ്ഞു പോയിട്ടും യാതൊരു കാറ്റിലും കോളിലും പെടാതെ നിലനില്‍ക്കുക തന്നെ ചെയ്യും.
ഞങ്ങളുടെ എല്ലാമെല്ലാമായിരുന്ന പ്രിയപ്പെട്ട ജനനേതാവിന് സ്വര്‍ഗത്തില്‍ ഉന്നത സ്ഥാനം നല്‍കണേ നാഥാ എന്ന് പ്രാര്‍ത്ഥിച്ചുകൊണ്ട്‌
