കാസര്‍കോട്: മൂന്ന് ദിവസം മാറ്റമില്ലാതെ തുടര്‍ന്ന സ്വര്‍ണവില ചൊവ്വാഴ്ച വീണ്ടും വര്‍ധിച്ചു. പവന് 280 രൂപ വര്‍ധിച്ച് 38080 രൂപയായി. ഗ്രാമിന് 4760 രൂപയാണ് വില. വെള്ളിയാഴ്ച പവന് 60 രൂപ കൂടി 37,800 രൂപയിലെത്തിയ ശേഷം ശനി, ഞായര്‍, തിങ്കള്‍ ദിവസങ്ങളില്‍ മാറ്റമുണ്ടായിരുന്നില്ല.
കഴിഞ്ഞ ഓഗസ്‌റ് ഏഴിന് പവന് 42,000 രൂപയിലെത്തി റെക്കോര്‍ഡ് സൃഷ്ടിച്ച സ്വര്‍ണവിലയില്‍ പിന്നീട് കാര്യമായ ചാഞ്ചാട്ടം പ്രകടമായിരുന്നു. വില കൂടുകയും കുറയുകയും ചെയ്യുന്ന സാഹചര്യമുണ്ടായിരുന്നു. ആഭ്യന്തര വിപണിയിലെ വ്യത്യാസമാണ് പ്രാദേശിക വിപണിയിലും പ്രകടമാകുന്നത്.
കഴിഞ്ഞ വര്‍ഷം മുതല്‍ ഇന്ത്യയിലെ സ്വര്‍ണ ഇറക്കുമതി തുടര്‍ച്ചയായി കുറയുകയാണ്. സാമ്പത്തിക മാന്ദ്യത്തിനൊപ്പം കൊവിഡ് വ്യാപനം കൂടി സ്വര്‍ണ വിപണിയെ ബാധിച്ചു. ഈ സാമ്പത്തിക വര്‍ഷത്തെ ആദ്യ നാല് മാസത്തില്‍ (ഏപ്രില്‍ ജൂലൈ) കാലയളവില്‍ 81 ശതമാനമാണ് ഇറക്കുമതിയിലെ ഇടിവ്. ജൂലൈ മാസത്തില്‍ സ്വര്‍ണ ഇറക്കുമതിയില്‍ മുന്‍വര്‍ഷത്തെ അപേക്ഷിച്ച് 24 ശതമാനം കുറവുണ്ടായി.
Gold Rate today Kasaragod
