തിരുവനന്തപുരം: യുവതിയുടെ വ്യാജ നഗ്നചിത്രങ്ങളുണ്ടാക്കി ഭര്‍ത്താവിന് അയച്ചുകൊടുത്ത കേസിലെ മൂന്നുപ്രതികളെ പൊലീസ് അറസ്റ്റ് ചെയ്തു. യുവതിയുടെ ബന്ധുവായ തിരുവനന്തപുരം മെഡി. കോളജിലെ ദന്ത ഡോക്ടര്‍, സീരിയല്‍ നടനായ നെടുമങ്ങാട് വാളിക്കോട് സ്വദേശി ജസീര്‍ ഖാന്, സുഹൃത്ത് നെടുമങ്ങാട് വേങ്കവിള സ്വദേശി ശ്രീജിത്ത് എന്നിവരെയാണ് തിരുവനന്തപുരം ഫോര്‍ട്ട് പൊലീസ് അറസ്റ്റ് ചെയ്തത്. യുവതിയുടെ ചിത്രങ്ങള്‍ മോര്‍ഫ് ചെയ്ത് വ്യാജ നഗ്നചിത്രങ്ങളാക്കി ഭര്‍ത്താവിന്റെയും ബന്ധുക്കളുടെയും വാട്സാപ്പ് നമ്പറുകളിലേക്ക് അയക്കുകയായിരുന്നു. ഫോര്‍ട്ട് ഇന്‍സ്പെക്ടര്‍ രാകേഷിന്റെ നേതൃത്വത്തിലുള്ള പൊലീസ് സംഘമാണ് മൂന്ന് പേരെയും പിടികൂടിയത്.
യുവതിയുടെ മാതൃസഹോദരിയുടെ മകനായ ദന്ത ഡോക്ടറാണ് സംഭവത്തിന് പിന്നിലെ മുഖ്യ ആസൂത്രകനെന്ന് പൊലീസ് വെളിപ്പെടുത്തി. ഇയാളുടെ നിര്‍ദേശപ്രകാരമാണ് ജസീര്‍ ഖാന് തന്റെ കൈവശമുള്ള ഫോണില്‍നിന്ന് മോര്‍ഫ് ചെയ്ത ചിത്രങ്ങള്‍ അയച്ചുനല്‍കിയത്. മറ്റൊരാളുടെ തിരിച്ചറിയല്‍ രേഖ ഉപയോഗിച്ച് ജസീര്‍ ഖാന് സിം കാര്‍ഡ് എടുത്തുനല്‍കിയതാണ് ശ്രീജിത്തിനെതിരേയുള്ള കുറ്റം.
വ്യാജ നഗ്നചിത്രങ്ങള്‍ അയച്ച മൊബൈല്‍ കേന്ദ്രീകരിച്ചുള്ള അന്വേഷണത്തിലാണ് മൂന്ന് പേരും കുടുങ്ങിയത്. ചിത്രങ്ങള്‍ അയച്ച നമ്പര്‍ തിരുവനന്തപുരം വട്ടപ്പാറ സ്വദേശിയുടെ പേരിലുള്ളതാണെന്ന് കണ്ടെത്തിയിരുന്നു. എന്നാല്‍ ഇങ്ങനെയൊരു നമ്പര്‍ താന്‍ ഉപയോഗിക്കുന്നില്ലെന്നായിരുന്നു വട്ടപ്പാറ സ്വദേശിയുടെ പ്രതികരണം. വിശദമായി പരിശോധിച്ചതോടെ ഇക്കാര്യം ശരിയാണെന്ന് പോലീസും സ്ഥിരീകരിച്ചു. തുടര്‍ന്ന് മൊബൈല്‍ കമ്പനിയില്‍ നിന്ന് കൂടുതല്‍ വിവരങ്ങള്‍ തേടുകയും അന്വേഷണം ശ്രീജിത്തിലേക്ക് എത്തുകയുമായിരുന്നു.
Morfing: 3 arrested include dentist and serial actor
