മംഗളൂരു: ബാങ്കിലേക്ക് പണം നിക്ഷേപിക്കാന്‍ പോകുകയായിരുന്ന പെട്രോള്‍ പമ്പ് മാനേജരെ അക്രമിച്ച് 4.20 ലക്ഷം രൂപ കൊള്ളയടിച്ച കേസില്‍ നാല് പ്രതികളെ പൊലീസ് അറസ്റ്റ് ചെയ്തു. മംഗളൂരുവിലെ ആശിര്‍വാദ് പെട്രോള്‍ പമ്പ് മാനേജര്‍ ബോജപ്പയുടെ പണം തട്ടിയെടുത്ത കേസില്‍ പ്രതികളായ പെട്രോള്‍ പമ്പ് ജീവനക്കാരന്‍ ശക്തിനഗര്‍ സ്വദേശി ശ്യാം ശങ്കര്‍, മുംബൈയിലെ മദ്യശാലയില്‍ മാനേജരായ കുഡുപു സ്വദേശി അഭിഷേക്, ചിത്രകാരന്മാരായ കാര്‍ത്തിക്, സാഗര്‍ എന്നിവരാണ് അറസ്റ്റിലായത്. സെപ്തംബര്‍ 28ന് ചിലമ്പിയിലാണ് സംഭവം. ബൊജപ്പ പണം നിക്ഷേപിക്കാന്‍ ബാങ്കിലേക്ക് പോകുമ്പോള്‍ സംഘം അക്രമിക്കുകയും പണം തട്ടിയെടുക്കുകയുമായിരുന്നു. ബോജപ്പ ജോലി ചെയ്തിരുന്ന പെട്രോള്‍ പമ്പില്‍ വര്‍ഷങ്ങളായി ശ്യാം ശങ്കര്‍ ജീവനക്കാരനായിരുന്നുവെന്ന് പൊലീസ് അന്വേഷണത്തില്‍ വ്യക്തമായിരുന്നു. ശ്യാം ശങ്കറും മറ്റ് പ്രതികളും ചേര്‍ന്ന് കവര്‍ച്ച ആസൂത്രണം ചെയ്തത് സെപ്റ്റംബര്‍ 13ന് ശക്തിനഗറില്‍ വെച്ചാണ്. സെപ്റ്റംബര്‍ 26ന് പദ്ധതി നടപ്പിലാക്കാന്‍ അവര്‍ തീരുമാനിച്ചെങ്കിലും അന്ന് അതിന് സാധിച്ചില്ല. രണ്ട് ദിവസത്തിന് ശേഷം പദ്ധതി നടപ്പിലാകുകയായിരുന്നു. കവര്‍ച്ചയ്ക്ക് ശേഷം പ്രതികള്‍ മുംബൈയിലേക്ക് മുങ്ങുകയാണുണ്ടായത്. ശ്യം ശങ്കറിന്റെ പക്കല്‍ നിന്ന് 60,00 രൂപയും വാഹനവും മൊബൈല്‍ ഫോണുകളും പൊലീസ് പിടിച്ചെടുത്തു. കൊലപാതകം, അക്രമം, പിടിച്ചുപറി തുടങ്ങിയ കേസുകളില്‍ ഉള്‍പ്പെട്ടവരാണ് പ്രതികളെന്ന് പൊലീസ് പറഞ്ഞു. മുംബൈയിലെ ഒരാള്‍ക്ക് പ്രതികള്‍ പണം നല്‍കി ചില സാധനങ്ങള്‍ വാങ്ങിയതായി അന്വേഷണത്തില്‍ തെളിഞ്ഞു. കുറ്റകൃത്യത്തില്‍ പ്രതികളെ സഹായിച്ചവര്‍ ഉള്‍പ്പെടെ കൂടുതല്‍ പേര്‍ അറസ്റ്റിലാകുമെന്ന് പൊലീസ് പറഞ്ഞു.
